قازاقستاندىق ونەرپازدار تاۋەلسىزدىكتىڭ 25 جىلدىعىنا وراي ەۋروپا ساحنالارىندا ونەر كورسەتتى
شىعارماشىلىق ۇجىمنىڭ كونسەرتتىك ساپارى ق ر مادەنيەت جانە سپورت مينيسترلىگى، قازاقستان رەسپۋبليكاسىنىڭ چەحيا، اۆستريا جانە ۇلى بريتانياداعى ەلشىلىكتەرىنىڭ قولداۋىمەن ۇيىمداستىرىلدى. پراگا (چەحيا)، ۆەنا (اۆستريا) جانە لوندونداعى ( ۇلى بريتانيا) مەرەكەلىك كەشتەردە ونەر كورسەتكەن قازاقستاندىق شەبەرلەردىڭ اراسىندا پروفەسسور، قازاقستاننىڭ حالىق ءارتىسى، قازاقستاننىڭ ەڭبەك ەرى ايمان مۇساقوجايەۆا، ەۋرازيا سيمفونيالىق ستۋدەنتتەر وركەسترى، قازاق ۇلتتىق ونەر ۋنيۆەرسيتەتىنىڭ دومبىراشىلار ءانسامبلى، «قورقىت اتا» قازاق ۇلتتىق اسپاپتار ءانسامبلى، لۆوۆ سيمفونيالىق وركەسترىنىڭ باس ديريجەرى، قازاقستاندىق ماەسترو ايدار تورىبايەۆ بار.
مەرەكەلىك گاسترولدىڭ كونسەرتتىك باعدارلاماسىنا شەتەلدىك جانە قازاقستاندىق كومپوزيتورلاردىڭ تۋىندىلارى ەندى. قاز ۇ و ۋ مۋزىكانتتارى ەۋروپالىق كورەرمەندەرگە حالىقارالىق بايقاۋلاردىڭ لاۋرەاتى، كومپوزيتور جانە پيانيست راحات-ءبي ءابدىساعىن، قازىرگى زاماننىڭ كورنەكتى كومپوزيتورى اقتوتى رايىمقۇلوۆا، تانىمال قازاقستاندىق قوبىز ورىنداۋشىسى ءالقۋات قازاقبايەۆتىڭ شىعارماشىلىعىن ۇسىندى.
قازاق ۇلتتىق ونەر ۋنيۆەرسيتەتى رەكتورىنىڭ پىكىرىنشە، ەۋروپانىڭ ۇزدىك ساحنالارىندا ونەر كورسەتۋ - قاز ۇ و ۋ شىعارماشىلىق ۇجىمىنىڭ جوعارى شەبەرلىگى جانە قازاقستاندىق ونەردى شەتەلدە ناسيحاتتاۋ جۇمىستارىنىڭ ناتيجەسى.
«ارينە، ءبىزدىڭ الدىڭعى قاتارلى ماقساتىمىز - جاس دارىندارعا قولداۋ كورسەتە وتىرىپ، ولاردىڭ الەمدىك ساحنادا ونەر كورسەتۋىنە ىقپال جاساۋ. شەتەلدىك كورەرمەندەردىڭ الدىندا ونەر كورسەتۋ ارقىلى جاس مۋزىكانتتار تاجەريبە جيناقتايدى جانە وزدەرىنىڭ ورىنداۋشىلىق مۇمكىندىكتەرىن جەتىلدىرۋ مۇمكىندىگىنە يە بولادى. ءبىزدىڭ كونسەرتتەرىمىز تاۋەلسىزدىكتىڭ 25 جىلدىعىنا ارنالادى. ءبىر ساحنادا الەمدىك كلاسسيكا جاۋھارلارى مەن اياعىنا نىق تۇرعان، تابىستى دا تاۋەلسىز، زاماناۋي قازاقستان اۋەندەرىنىڭ ورىندالۋى ەرەكشە مانگە يە»، - دەپ پىكىرىمەن ءبولىستى ايمان قوجابەك قىزى.
شەبەر ورىندالعان مۋزىكالىق تۋىندىلار ەۋروپالىق كورەرمەندەردى وزىندىك ەرەكشەلىكتەرگە تولى جانە كوپ ءتۇرلى قازاقستان ۇلتتىق ونەرىنىڭ الەمىنە بولەدى. ولار تاۋەلسىز قازاقستان ونەرپازدارىنىڭ التىن بەسىگىنە اينالعان قاز ۇ و ۋ وقىتۋشىلارى مەن ستۋدەنتتەرىنىڭ ورىنداۋىنداعى حالىق جانە كلاسسيكالىق مۋزىكا تۋىندىلارىن تىڭدادى.
