نازاربايەۆ: ەلىمىز تاۋەلسىزدىكتىڭ 25 جىلدىعىن جاقسى كوڭىلمەن قارسى الاتىن بولسىن

استانا. قازاقپارات - ەلىمىز تاۋەلسىزدىكتىڭ 25 جىلدىعىن جاقسى كوڭىلمەن قارسى الاتىن بولسىن.

بۇگىن اقوردادا ءوتىپ جاتقان ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ ۇكىمەت پەن بارلىق دەڭگەيدەگى اكىمدەرگە وسىنداي تاپسىرما جۇكتەدى.

مەملەكەت باسشىسى اعىمداعى ەل تاۋەلسىزدىگىنىڭ 25 جىلدىق مەرەيتويىن كەڭىنەن اتاپ وتەتىندىگىمىزگە باسا نازار اۋداردى.

«توي-تومالاق پەن جينالىستار وتكىزۋ ءبىر باسقا. ءاربىر اۋىل، ءاربىر اۋدان، ءاربىر قالادا حالىق بۇگىنگى كۇنى نە ىستەلىپ جاتقانىن كورىپ، بىلەتىن بولسىن. 25 جىلدىڭ ىشىندە ادامنىڭ ويىنا كەلمەگەن شارۋالار، 100 جىلعا تاتيتىن دۇنيەلەر جاسالدى. ول بارلىق اۋىلدا دا، اۋداندا دا، وبلىستا دا كورىنىپ تۇر. قيىنشىلىق جاعدايلار بولسا ادامدارعا كومەكتەسۋ قاجەت. بارشا جۇرتشىلىق، ەلىمىز جاقسى كوڭىلمەن قارسى الاتىن بولسىن»، - دەدى ن. نازاربايەۆ.

سونىمەن قاتار ەلباسى وسىدان ءبىراز ۋاقىت بۇرىن پرەمەر-مينيسترگە تاپسىرما بەرىلىپ، ول ءبىراز ءوڭىردى ارالاپ شىققاندىعىن ەسكە سالىپ ءوتتى. ناتيجەسىندە وڭىرلەردەگى تۇيتكىلدەردى شەشۋمەن اينالىساتىن ارنايى توپتاردىڭ قۇرىلعانىن ايتتى.

«كەلەسى ۇكىمەت سول تاپسىرمالاردى ارى قاراي ورىنداپ، اكىمدەرمەن بىرگە بارلىعىن شەشۋى قاجەت. «100 ناقتى قادام» ۇلت جوسپارى، «نۇرلى جول» باعدارلامالارى ءبىز داعدارىسقا قارسى جۇزەگە اسىرىپ جاتقان ءىس-شارالار ەدى. ول ءوز ناتيجەسىن بەرۋدە دەپ ايتۋعا بولادى. مۇنى تەك قانا ەكونوميكالىق كورسەتكىشتەردە عانا ەمەس، ناقتى ومىردەن دە كورىپ وتىرمىز»، - دەدى ق ر پرەزيدەنتى.

اۆتور: مارلان جيەمباي