پان گي مۋن سەمەي يادرولىق الاڭىنىڭ جابىلعانىنا 25 جىل تولۋىنا وراي ارنايى ۇندەۋ جاريالادى

ۇندەۋدىڭ ءماتىنى ب ۇ ۇ رەسمي سايتىندا ورنالاسقان.
ايتا كەتەرلىگى، 2016 -جىلدىڭ 29 -تامىزىندا الەم بويىنشا حالىقارالىق يادرولىق سىناقتارعا قارسى ءىس- ارەكەتتەر كۇنى رەتىندە اتالىپ وتەدى. بۇل ايتۋلى كۇن قازاقستاننىڭ 2009 -جىلعى باستاماسى بويىنشا ب ۇ ۇ باس اسسامبلەياسىنىڭ قارارىمەن قابىلدانعان بولاتىن.
وسىعان بايلانىستى بۇۇ باس حاتشىسى ءوزىنىڭ جولداعان ۇندەۋىندە بۇل كۇنى 450 دەن استام يادرولىق سىناقتار جاسالعان قازاقستانداعى سەمەي پوليگونىنىڭ جابىلعانىنا شيرەك عاسىر تولىپ وتىرعانىنا نازار اۋدارادى.
«مەن 2010 -جىلى سەمەيگە بارعاندا سىناق ۋىتىنان زاقىمدالعان جەرلەردى عانا ەمەس، سول زۇلمات قۇرباندارىنىڭ، امان قالعان ادامداردىڭ كۇش- جىگەرىن كوردىم. مەن ولاردىڭ بەيبىت ومىرگە ۇمتىلىسىن، يادرولىق قارۋدان ازات بولۋعا ۇندەيتىن باتىل قادامدارىن قولدايمىن... بارلىق يادرولىق سىناقتارعا تىيىم سالۋ وسىناۋ زۇلىمدىق مۇراسىن جويۋعا سەپتىگىن تيگىزەر ەدى»، - دەپ مالىمدەگەن پان گي مۋن.
ونىڭ ايتۋىنشا، يادرولىق سىناقتارعا جاپپاي تىيىم سالۋ - قارۋسىزدانۋ سالاسىنداعى باسقا قادامدارعا ۇلكەن سەرپىلىس تۋدىرادى.
«وسى ارقىلى كوپجاقتى ىنتىماقتاستىقتىڭ مۇمكىن ەكەنىن دە كورەتىن ەدىك. قاۋىپسىزدىك سالاسىندا، سونىڭ ىشىندە تاياۋ شىعىستا يادرولىق قارۋدان جانە جاپپاي قىرىپ- جوياتىن باسقا دا قارۋ تۇرلەرىنەن ازات ايماق قۇرۋ سەكىلدى وڭىرلىك دەڭگەيدەگى قابىلداناۋى ءتيىس شارالار بويىنشا سەنىمدەر نىعاياتىن ەدى»، - دەدى پان گي مۋن.
بۇدان بولەك، باس حاتشى بارلىق ەلدەر مەن حالىقتاردى 20 جىل بۇرىن باس اسسامبلەيا قابىلداعان، الايدا ءالى كۇنگە كۇشىنە ەنبەي تۇرعان يادرولىق سىناقتارعا جالپىلاما تىيىم سالۋ تۋرالى كەلىسىمدى بارىنشا تەزىرەك كۇشىنە ەنگىزۋگە شاقىرادى. «ءبىز وسى ارقىلى يادرولىق قارۋدان ازات، بەيبىتشىلىككە قاراي قادام جاساي الاتىن ەدىك»، - دەلىنگەن ۇندەۋدە.
اۆتور: قانات مامەتقازى ۇلى