تاۋەلسىزدىكتىڭ 25 جىلدىعىن تويلاۋ بارىسىندا سانعا ەمەس، ساپاعا ءمان بەرۋ قاجەت - مەملەكەتتىك حاتشى

استانا. قازاقپارات - مەملەكەتتىك حاتشى گۇلشارا ءابدىقالىقوۆا قازاقستان تاۋەلسىزدىگىنىڭ 25 جىلدىعىن وتكىزۋگە ارنالعان مەملەكەتتىك كوميسسيانىڭ وتىرىسىندا ءبىرقاتار تاپسىرمالار جۇكتەدى.

«قازاقستان تاۋەلسىزدىگىن مەرەكەلەۋ بارىسىندا ۇيىمداستىرۋشىلارعا ءبىلىم بەرۋ جۇيەسىنە ءمان بەرۋ كەرەك. ق ر ءبىلىم جانە عىلىم مينيسترلىگى مەرەيتويلىق جىلدى اتاپ وتۋگە ەلدىڭ بارلىق وڭىرلەرىندەگى جاستار مەن جاستار ۇيىمدارىن تارتۋعا كۇش سالۋى ءتيىس. بارلىق وقۋ ورىندارى ستۋدەنتتىك جاستاردى اتالمىش شارالارعا بەلسەندى قاتىستىرۋعا تارتۋ قاجەت»، - دەدى گ. ءابدىقالىقوۆا.

سونىمەن قاتار ق ر مەملەكەتتىك حاتشىسى مەرەكەلىك شارالاردىڭ ەل ايماقتارىندا وتكىزىلۋىنە اسا ۇلكەن ماڭىز بەرۋ قاجەتتىگىن اتاپ ءوتتى.

«ءار ايماق تاۋەلسىزدىكتىڭ 25 جىلدىعىن مەرەكەلەۋدىڭ وڭىرلىك جوسپارىن جاساۋلارى كەرەك. ول جوسپارلار ق ر مادەنيەت جانە سپورت مينيسترلىگىمەن كەلىسۋ قاجەت. سونىمەن قاتار شارالاردىڭ سانىنا ەمەس، حالىقتى مەرەيتويلىق باعدارلامالارمەن قامتۋ دەڭگەيىنە ءمان بەرگەن ءجون. ءبىرىڭعاي الگوريتمدى قامتاماسىز ەتۋ ماقساتىندا 25 - ساۋىرگە دەيىن ق ر مادەنيەت جانە سپورت مينيسترلىگىنە اكىمدىكتەردىڭ جوسپارلارىمەن تانىسۋدى تاپسىرامىن»، - دەدى ول.

 «تاۋەلسىزدىكتىڭ 25 جىلدىعىن تويلاۋعا ارنالعان شارالار جوسپارىن ەگجەي- تەگجەيلى جاساقتاپ، ونى ۇكىمەت دەڭگەيىندە بەكىتۋ قاجەت. جارلىققا سايكەس، جوسپاردى جاساۋعا ءبىر اي، ياعني 28- ساۋىرگە دەيىن ۋاقىت بەرىلدى»، - دەدى گ. ءابدىقالىقوۆا.

مەملەكەتتىك حاتشىنىڭ اتاپ وتكەنىندەي، مەرەيتويلىق شارالاردىڭ بارلىعى ءماندى ءوتۋى ءتيىس جانە وعان قاجەتتى رەسۋرستارمەن قامتىلۋى قاجەت.

«ەگەر قانداي دا ءبىر سەبەپتەرمەن قاراجات جەتپەي تۇرسا، ول شارانى وتكىزۋدەن باس تارتقان ءجون جانە از قاراجاتپەن وتكىزۋگە بولاتىن شارالارعا باسىمدىق بەرىلسىن. ءبىز بىلتىر قازاق حاندىعىنىڭ 550 جىلدىعىن، ق ر كونستيتۋتسياسىنىڭ 25 جىلدىعى مەن ق ح ا جىلىن اتاپ وتتىك، وڭ تاجىريبە جيناقتالدى»، - دەدى گ. ءابدىقالىقوۆا.

ونىڭ ءسوزى بويىنشا، ۇيىمداستىرىلاتىن شارالار مەيلىنشە كوپ حالىقتى قامتۋى كەرەك.

 «بۇنىڭ بارلىعى ەڭ الدىمەن حالىق ءۇشىن جاسالىپ جاتىر. اسا ۇلكەن ءرول «نۇر وتان» پارتياسىنا، ق ح ا- عا، ازاماتتىق اليانسقا بەرىلمەك. سونىمەن قاتار «اتامەكەن» ۇ ك پ- نىڭ بەلسەندى قاتىسۋىن قالار ەدىك»، - دەدى مەملەكەتتىك حاتشى.

«ونىڭ ۇستىنە جىل سوڭىنا دەيىن، ەلدىمەكەندەردى اباتتاندىرۋعا، جولداردى جوندەۋگە، قوعامدىق ورىنداردى كوركەيتۋگە، كوممۋنالدىق ينفراقۇرىلىمداردى جاقسارتۋعا، اۋىزسۋمەن قامتاماسىز ەتۋگە جانە جاسىل جەلەكتى وتىرعىزۋعا قاتىستى جۇمىستاردى جالعاستىرۋ قاجەت»، - دەپ ءتۇيدى ءسوزى ق ر مەملەكەتتىك حاتشىسى گ. ءابدىقالىقوۆا.