الماتى قالاسىنىڭ ساۋلەتتىك-كوركەمدىك بەينەسىن قالىپتاستىرۋعا ارنالعان ۇزدىك 25 جوبا انىقتالدى

الماتى. قازاقپارات - الماتى اكىمدىگىندە قالانىڭ ساۋلەتتىك-كوركەمدىك بەينەسىن قالىپتاستىرۋ ماقساتىندا برەند-بۋك (برەندتىڭ قۇندىلىقتارى تۋرالى نۇسقاۋلىق) جاساۋعا اشىق بايقاۋدىڭ ۇزدىكتەرىن انىقتاۋ ءۇشىن ساراپشىلار وتىرىسى ءوتتى.

بۇل تۋرالى بۇگىن الماتى قالاسى اكىمدىگىنىڭ باسپا ءسوز قىزمەتىنەن حابارلادى.

بايقاۋدىڭ ماقساتى - الماتى قالاسىنىڭ برەند-بۋگىن جاساۋ بويىنشا ۇزدىك تۇجىرىمدامالىق جوبالاردى انىقتاۋ. ولاردا الماتىنىڭ قالا قۇرىلىسى ءداستۇرى بارىنشا تولىق قامتىلىپ، ونىڭ وزىندىك ەرەكشەلىكتەرى، تاريحي-مادەني مۇراسى جانە قازىرگى دامۋ بارىسى ەسكەرىلۋى ءتيىس. سونداي-اق، قالانىڭ جاڭارۋىنا سەپتىگىن تيگىزەتىندەي بولۋى كەرەك.

بايقاۋعا قاتىسۋعا شىعارماشىلىق شەبەرحانالار، جارنامالىق اگەنتتىكتەر مەن فيرمالار، سۋرەتشىلەر، ديزاينەرلەر، ساۋلەتشىلەر، جوبالاۋ ۇيىمدارى، ساباقتاس ماماندىقتاردىڭ ماماندارى، سونداي-اق، شىعارماشىلىق جوعارى وقۋ ورىندارىنىڭ ستۋدەنتتەرى جانە بەيىندى ءبىلىم بەرۋ مەكەمەلەرىنىڭ وقۋشىلارى شاقىرىلدى.

2016-جىلدىڭ 15-اقپانىنا دەيىن 109 ءوتىنىم قابىلداندى.

«109 جۇمىستىڭ ىشىنەن ەڭ ۇزدىك 25 جۇمىستى تاڭداپ الدىق. وسى ۇمىتكەرلەردىڭ جۇمىسىن ينتەرنەت رەسۋرستاردا 1 اي كولەمىندە جاريالاۋدى ۇسىنامىن. مۇنى ەل ازاماتتارىنىڭ بارلىعى كورۋ كەرەك. كەلەر ايدىڭ سوڭىندا تاعى جينالىپ، ۇزدىكتەردى ىرىكتەپ الامىز»، - دەدى قالا قۇرىلىسى جانە ساۋلەت باسقارماسىنىڭ باسشىسى عابيت سادىربايەۆ.

ساراپشى كوميسسيانىڭ قۇرامىنا سۋرەتشىلەر، ديزاينەرلەر، اقىندار مەن ونەرتانۋشىلار كىرەتىنىن ايتا كەتۋ كەرەك.

«جۇمىستاردىڭ %95 ى تەك قالانىڭ بەينەسىن كورسەتكەن. برەند بۋك دەگەنىمىز تەك سۋرەت ەمەس، ول ۇلكەن يدەيا. الماتىنىڭ كوپ ەلمەن باسەكەلەسە الاتىن قابىلەتى مول. تۋريستىك جاعىنان دا، ينۆەستيتسيالىق كليمات جاعىنان دا»، - دەدى قازاقستان سۋرەتشىلەر وداعىنىڭ مۇشەسى سەرىك بۋكسيكوۆ.

ايتا كەتۋ كەرەك، ءبىرىنشى ورىن ءۇشىن - 1000000 (ءبىر ميلليون) تەڭگە، ەكىنشى ورىن ءۇشىن - 800000 (سەگىز ءجۇز مىڭ) تەڭگە، ءۇشىنشى ورىن ءۇشىن 500000 (بەس ءجۇز مىڭ) تەڭگە تاعايىندالعان.

اۆتور: گۇلميرا عوسمانالي