الماتىدا ۇلى كوشتىڭ باستالعانىنا 25 جىل تولۋىنا وراي حالىقارالىق كونفەرەنسيا وتەدى
بۇل تۋرالى بۇگىن دۇنيەجۇزى قازاقتارى قاۋىمداستىعى ۇيىندە وتكەن «كوشى-قوننىڭ بۇگىنگى جاعدايى» اتتى دوڭگەلەك ۇستەل جيىنىندا ايتىلدى.
«2016-جىلى ۇلى كوشتىڭ باستالعانىنا 25 جىل تولادى. ول 1991-جىلدىڭ ناۋرىزىندا بايانولگيدەن باستالدى. ونى باستاعان عازيز اعامىز بۇگىن ورتامىزدا وتىر. كەلەسى جىلدىڭ العاشقى جارتىجىلدىعىندا «ۇلى كوشتىڭ باستالۋى، جالعاسۋى جانە بۇگىنگى جاعدايى» دەپ اتالاتىن حالىقارالىق عىلىمي-تاجىريبەلىك كونفەرەنسيا وتكىزۋدى جوسپارلاپ وتىرمىز»، - دەدى دۇنيەجۇزى قازاقتارىنىڭ قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشيەۆ.
شيرەك عاسىردى قۇرايتىن ۋاقىتتا قازاقستانعا الىس-جاقىن شەت ەلدەردەن 1 ميلليونعا جۋىق قازاق كوشىپ كەلگەن، دەپ حابارلانعان دۇنيەجۇزى قازاقتارى قاۋىمداستىعىنىڭ سايتىندا.
تالعات اسىل ۇلىنىڭ ايتۋىنشا، اتا جۇرتقا كەلگەن قانداستارىمىز ءار سالادا ءوز ورنىن تاۋىپ، قازاقستاننىڭ دامۋىنا ۇلكەن ۇلەس قوستى. ەندى قازاقستان رەسپۋبليكاسى پرەزيدەنتىنىڭ 24- قاراشا كۇنى قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» №421-V قازاقستان رەسپۋبليكاسىنىڭ زاڭى بويىنشا سوڭعى كەزدە سايابىرسي باستاعان ۇلى كوش قايتا الداعى ۋاقىتتا قايتا جاندانباق.
