قازاقستانداعى كيىكتەر سانى 257 مىڭعا جۋىقتادى

«قازاقستانداعى كيىكتەردىڭ سانى 256,7 مىڭعا جەتىپ، 2005 - جىلمەن سالىستىرعاندا 6,4 ەسەگە ارتتى. سونداي- اق ارقار، قاراقۇيرىق، قۇلان، بۇعىلاردىڭ سانى وسۋدە»، - دەلىنگەن مينيسترلىك مالىمەتىندە.

ۆەدومستۆونىڭ «قازاقپاراتقا» بەرگەن دەرەكتەرىنە سۇيەنسەك، براكونەرلىكپەن كۇرەس بويىنشا قابىلدانىپ جاتقان شارالارعا قاراماستان، كيىكتەردى زاڭسىز اتۋ ازايعان جوق. 2014 - جىلى ورمان شارۋاشىلىعى جانە جانۋارلار دۇنيەسى كوميتەتى مەن ق ر ءى ءى م بوكەندەر مەكەندەيتىن ورتادا كيىكتەردى اتۋ، ولاردىڭ مۇيىزدەرىن ساتىپ الۋ مەن تاسىمالداۋ بويىنشا 68 فاكتىنى تىركەدى. قاسكوي اڭشىلار 300 دەن استام كيىكتى اتىپ العان، وسى زاڭ بۇزۋشىلاردان 1015 بوكەن ءمۇيىزى تاركىلەندى.

اتاپ ايتقاندا، بۇل فاكتىلەر ەلىمىزدەن تىس جەرلەرگە كيىك مۇيىزدەرىن كونتراباندالىق جولمەن تاسىمالداۋ مۇمكىندىگىن بايقاتىپ وتىر. بۇل جانۋارلاردىڭ مۇيىزدەرى شىعىس مەديسيناسىندا دارىلىك زات شيكىزاتى رەتىندە پايدالاناتىنى بەلگىلى. سونىمەن قاتار كيىكتەردىڭ سانىن ارتتىرۋعا كەدەرگى تاعى ءبىر پروبلەما - ول جانۋارلاردىڭ ينفەكسيالارعا سەزىمتالدىعى.

ەستەرىڭىزگە سالا كەتەيىك، 2010-2013 - جىلدارى ب ق و، قوستاناي، اقمولا وبلىستارىندا پاستەرەللەزدەن بوكەندەردىڭ جاپپاي قىرىلۋى انىقتالدى. ناتيجەسىندە 14 مىڭنان استام جانۋار قىرىلدى. مينيسترلىكتىڭ مالىمەتىنشە، كيىكتەردىڭ دەرتى جەتكىلىكتى دەڭگەيدە زەرتتەلمەگەن، سوندىقتان بۇل جاعداي ولاردىڭ كوبەيۋىنە ناقتى قاتەر تۋدىرىپ وتىر.

وسى ورايدا ق ر ا ش م ورمان شارۋاشىلىعى جانە جانۋارلار دۇنيەسى كوميتەتى مەن ق ر ب ع م 2012 - جىلدان باستاپ كيىكتەردىڭ ينفەكتسيالىق ىندەتتەرىن زەرتتەۋ بويىنشا عىلىمي- تەحنيكالىق باعدارلامانى جۇزەگە اسىرۋدا. بۇل باعىتتاعى جۇمىستار ينفەكتسيالىق دەرتتەردىڭ الدىن الۋعا نەگىزدەلگەن.

قازاقستاندا كيىكتەردىڭ بەتپاقدالا تارالىمى، ال ەكىنشىسى - ءۇستىرت جانە ورال تارالىمدارى مەكەندەيدى. ق ر ا ش م دەرەكتەرىنە سۇيەنسەك، ⅩⅩ عاسىردىڭ 90- جىلداردا ولاردىڭ سانى 1 ميلليوننان استامنان 2003 - جىلى 21 مىڭ باسقا دەيىن تومەندەۋىنەن بۇل جانۋارلاردى ساقتاپ قالۋ پروبلەماعا اينالدى.

اۆتور: رۋسلان عابباسوۆ