قاڭتار وقيعاسى: 2565 قىلمىستىق ءىس قارالىپ جاتىر
بۇل تۋرالى ق ر ءى ءى م تەرگەۋ دەپارتامەنتىنىڭ باستىعى سانجار ءادىلوۆ ايتتى، دەپ حابارلايدى قازاقپارات ءتىلشىسى.
«ىشكى ىستەر مينيسترلىگى ەلدەگى قۇقىقتىق ءتارتىپتى قامتاماسىز ەتۋ جانە قاڭتار وقيعاسىن تەرگەۋ جۇمىسىن جالعاستىرۋدا. بۇگىنگى تاڭدا ىشكى ىستەر ورگاندارى تەرگەۋشىلەرىنىڭ وندىرىسىندە 2565 قىلمىستىق ءىس بار. ولار بويىنشا 271 ادام كۇزەتپەن ۇستالۋدا. ۇستاۋ جانە بۇلتارتپاۋ شاراسىن تاڭداۋ تۋرالى بارلىق شەشىمدەر قىلمىستىق پروتسەسس تالاپتارىنا سايكەس ءارى مىندەتتى تۇردە پروكۋراتۋرامەن كەلىسۋ جانە سوت سانكسياسىمەن قابىلدانۋدا»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، ۇستالعان ادامدارعا قاتىستى زاڭسىز ءىس-ارەكەتتەر تۋرالى ءاربىر ءوتىنىش بويىنشا ىشكى ىستەر مينيسترلىگىنىڭ وزىندىك قاۋىپسىزدىك دەپارتامەنتى تەكسەرۋ جۇرگىزەدى.
«قازىرگى ۋاقىتتا قۇقىق قورعاۋ ورگاندارى قىزمەتكەرلەرىنىڭ بيلىكتى اسىرا پايدالانعانى تۋرالى 59 ءوتىنىش قارالدى. ولار بويىنشا قىلمىستىق ءىس قوزعالىپ، سىبايلاس جەمقورلىققا قارسى قىزمەتكە بەرىلدى. 18 ءوتىنىش بويىنشا ازاماتتاردان تۇسىنىكتەمە الىنىپ، بەينەجازبالاردى زەرتتەي وتىرىپ، قىزمەتتىك تەكسەرۋ مۇقيات جۇرگىزىلدى. بيلىكتى اسىرا قولدانۋ فاكتىلەرى راستالعان جوق»، - دەدى سانجار ءادىلوۆ.
