الماتىدا 250 مىڭ دوللار سالىنعان سەيف ۇرلاندى

الماتى. قازاقپارات - الماتى پوليتسياسىنىڭ قىزمەتكەرلەرى 250 مىڭ ا ق ش دوللارى بار سەيفتى ۇرلادى دەگەن كۇدىكپەن الماتى وبلىسىنىڭ 34 جاستاعى تۇرعىنىن ۇستادى، دەپ حابارلايدى قازاقپارات ءتىلشىسى.

الماتى پوليسياسىنىڭ مالىمەتىنشە، 1989 -جىلعى كۇدىكتى بوتەننىڭ جەكە ۇيىنە باسىپ كىرىپ، ءىرى كولەمدەگى اقشاسى بار سەيفتى الىپ شىققان.

«ۇرلىق بولعان كەزدە ءۇيدىڭ يەسى بولماعان. بىرنەشە كۇن بۇرىن دەمالىسقا كەتكەن. وتاعاسىنىڭ ايتۋىنشا، ول - جەكە كاسىپكەر. 250 مىڭ دوللاردى ۇيىندەگى سەيفتە ساقتاعان»، - دەيدى مەدەۋ اۋداندىق پوليتسيا ءبولىمىنىڭ باستىعى ءىلياس ومىرسەرىكوۆ.

كۇدىكتى قاماۋعا الىنىپ، كىناسىن مويىندادى.

«كۇدىكتىنىڭ تۇرعىلىقتى جەرىنە ءتىنتۋ جۇرگىزىلدى. ول ۇرلانعان اقشانى كوڭنىڭ اراسىنا تىعىپ قويعان. ايعاقتى زاتتار تاركىلەنىپ، قىلمىستىق ءىس ماتەريالدارىنا تىركەلدى»، - دەدى ءىلياس ومىرسەرىكوۆ.

ق ر قىلمىستىق كودەكتىڭ 201-بابىنا سايكەس، تەرگەۋ مۇددەسىندەگى وزگە دە مالىمەتتەر جاريالانبايدى.