قىتايداعى قۇرىلتايعا 250 دەن استام قازاقستاندىق ستۋدەنت قاتىستى
«قازاقستاننىڭ ەكونوميكالىق- الەۋمەتتىك دامۋىنا جاستاردىڭ قوساتىن ۇلەسى» اتتى قۇرىلتاي تاقىرىبىن تالقىلاۋعا قىتايدىڭ 17 قالاسىندا وقيتىن 250 دەن استام ستۋدەنت قاتىستى. ونىڭ تەڭ جارتىسى قىتاي استاناسىندا وقىسا، قالعان جارتىسى شانحاي، نانكين، شيان، حانجوۋ، داليان، ۋحان، چۋنتسين، چاڭجوۋ، سۋجوۋ، جەنتسزيان، گۋاڭجوۋ، ءۇرىمجى، حاربين، تايۋان، تيانجين، لانجوۋ قالالارىندا ءبىلىم الىپ جاتىر.
قۇرىلتايدىڭ اشىلۋ سالتاناتىندا قازاقستان ەلشىسى شاحرات نۇرىشيەۆ، قىتاي مۇناي ۋنيۆەرسيتەتىنىڭ پرورەكتورى ۋ سياولين، KSAC ۇيىمىنىڭ ءتورايىمى نۇرگۇل ماكۇلبەك ءسوز سويلەدى.
«ەلشىلىك قىتايدا وقىعان جاستاردىڭ تالىمگەرلىكتەن ءوتىپ، وقۋدان كەيىن جۇمىسقا ورنالاسۋىنا باسا ءمان بەرەدى. بىلتىردان بەرى قازاقستاندا ينۆەستيتسيالىق جوبالاردى ىسكە اسىرۋشى قىتايلىق كومپانيالارمەن بىرلەسىپ، «بوس ورىندار جارمەڭكەسىن» وتكىزۋدى قولعا الدىق. «نۇرلى جول» جاڭا ەكونوميكالىق ساياساتى مەن جىبەك جولى ەكونوميكالىق بەلدەۋىنىڭ قيىلىسى اياسىندا ءبىزدىڭ ەلدە 55 كاسىپورىن اشىلىپ، 27 ميلليارد دوللار ينۆەستيتسيا قۇيىلدى. بۇل بولاشاقتا 20 مىڭنان استام جۇمىس ورنىن اشۋعا مۇمكىندىك بەرەدى. اتالمىش جۇمىس ورىندارىنىڭ كوبى قىتاي ءتىلىن ءبىلۋدى قاجەت ەتەتىنى انىق» ، - دەدى قازاقستان ەلشىسى.
ول سونداي- اق، قىتايدىڭ شەتەلدەگى كاسىپورىنداردى دامىتۋ قاۋىمداستىعىمەن (CODA - China Overseas Development Association) بىرگە «بوس ورىندار جارمەڭكەسىن» ۇيىمداستىرۋ تاجىريبەسى ءداستۇرلى شاراعا اينالادى دەگەن ءۇمىت ءبىلدىردى.
«بۇگىنگى قۇرىلتاي اياسىندا وتكەن «جارمەڭكەنىڭ» ارقاسىندا جاستار تالىمگەرلىكتەن ءوتىپ، جۇمىسقا ورنالاسۋعا مۇمكىندىك الادى» ، - دەدى شاحرات نۇرىشيەۆ.
سالتاناتتى شارا بارىسىندا شاحرات نۇرىشيەۆ قاۋىمداستىقتىڭ جۇمىسىنا بەلسەندى اتسالىسقان اققالبەك تاعابەرگەنوۆكە (حاڭجوۋ) ، نۇرتاس يسابەككە (شاڭحاي) ، ايان ۇسىپالىگە (تيانجين) ، تيمۋر كوشەربايەۆقا (نانكين) ، ەركىن دالەلحانعا (لانجوۋ) ، ءادىلحان دۇيسەمبايەۆقا، ازيزا لەسكەنگە، اسەل قوجاعۇلعا، جانسايا توكيشيەۆاعا، سالتانات دوسپانوۆاعا جانە داۋلەت جاقسىبەككە (بەيجىڭ) گراموتا تابىستادى.
ايتا كەتسەك، قىتايداعى قازاقستاندىق ستۋدەنتتەردىڭ قۇرىلتايىن وتكىزۋ قازاقستاننىڭ قىتايداعى ەلشىلىگى مەن ق ر ءبىلىم جانە عىلىم مينيسترلىگىنىڭ حالىقارالىق باعدارلامالار ورتالىعىنىڭ باستاماسىمەن جولعا قويىلعان. «Kazakhstan Students Association in China» (KSAC) دەگەن اتى بار قاۋىمداستىق 2013 -جىلعى ەكىنشى قۇرىلتايدا قۇرىلعان بولاتىن. قازىر ونىڭ قۇرامىنا 10 مىڭ قازاقستاندىق ستۋدەنت كىرەدى. وتكەن جىلى اتالمىش قۇرىلتاي حاڭجوۋ قالاسىندا ءوتتى.