اقمولاداعى تەمىر جولدا بولعان اپاتتان كەيىن 250 جولاۋشىعا بيلەتتەر قۇنى قايتارىلدى
«27 -جەلتوقسان كۇنى كەشكە باباتاي ستانسىسىندا بولعان وقيعا تۋرالى اقپارات تۇسكەننەن كەيىن استانا مەن قاراعاندىدان ەكى قالپىنا كەلتىرۋ پويىزى جەدەل اتتاندىرىلدى. وقيعا سالدارىن جويۋعا اقمولا، قاراعاندى جول بولىمشەلەرىنىڭ بارلىق قىزمەتتەرىنىڭ جۇمىسشىلارى قاتىستى. جەدەل ارەكەتتىڭ ارقاسىندا التى ساعاتتان كەيىن جول اشىلدى، دەلىنگەن حابارلامادا.
«ءبىز وقيعا ورنىنا ۋاقتىلى جەتتىك، تەحنيكانى پايدالانىپ ۆاگونداردى كوتەردىك. ۇجىمنىڭ جۇمىلا جۇمىس ىستەۋىنىڭ ارقاسىندا بارىنشا قىسقا ۋاقىتتا جول اشىلدى»، - دەپ اتاپ ءوتتى استانا قالپىنا كەلتىرۋ پويىزىنىڭ باستىعى مارات بەيسەنوۆ.
قوزعالىستىڭ توقتاۋىنا بايلانىستى استانا- قاراعاندى ۋچاسكەسى بويىنشا ەلوردالىق تەمىر جول ۆوكزالىندا 600-800 گە جۋىق ادام جينالىپ قالدى. «ۆوكزال عيماراتىنا قوسىمشا وتىراتىن ورىندىقتار قويىلدى. ولاردىڭ سانى 600 گە دەيىن ارتتى. بالالارى بار 50 جولاۋشى انا مەن بالا بولمەسىنە جايعاستىرىلدى. ەگدە ادامدارعا قوسىمشا بولمەلەر ءبولىندى»، - دەلىنگەن حابارلامادا.
ءۇش مينۋت سايىن تۇراقتى تۇردە ديكتورلار جولاۋشىلارعا پويىزدىڭ تەحنيكالىق سەبەپتەرگە بايلانىستى كەشىگىپ جاتقانىن حابارلاپ وتىردى. 28 -جەلتوقساندا ساعات 04.30 مينۋتتا تىلەك بىلدىرگەن بارلىق جولاۋشىلار ساپارعا اتتاندى. قازىر ۆوكزال شتاتتى رەجىمدە جۇمىس ىستەۋدە. 27 -جەلتوقساندا وساكاروۆكادان استاناعا جولاۋشىلاردى جەتكىزۋ ءۇشىن 10 شاقتى اۆتوبۋس ءبولىندى. 250 جولاۋشىعا بيلەتىنىڭ اقشاسى كەرى قايتارىلدى.
