ريو التىنىن العان سپورتشىعا 250 مىڭ دوللار بەرىلەدى

استانا. قازاقپارات - وليمپيادادا، ونىڭ ىشىندە 2016-جىلدىڭ تامىزىندا وتەتىن ريو-دە-جانەيرو ويىندارىندا جۇلدەگەر اتانعان سپورتشىلارعا بەرىلەتىن سىياقى كولەمى وزگەرىسسىز قالادى.

بۇل تۋرالى «قازاقپارات» اگەنتتىگىنىڭ رەسمي ساۋالىنا وراي ەلىمىزدىڭ ق ر مادەنيەت جانە سپورت مينيسترلىگىنەن ءمالىم ەتتى.

«ۇكىمەت قاۋلىسىمەن وسى ۋاقىتقا دەيىن بەكىتىلگەن وليمپيادا جۇلدەگەرلەرىنىڭ سىياقى كولەمى وزگەرىسسىز قالادى: وليمپيادا التىنىنا 250 مىڭ، كۇمىسىنە 150 مىڭ، ال قولا مەدالىنە 75 مىڭ دوللار بەرىلەدى»، - دەدى مينيسترلىكتەن.

ۆەدومستۆو اقپاراتىنا سايكەس، وسى ۋاقىتقا دەيىن ەلىمىزدىڭ سپورتشىلارى سپورتتىڭ 12 تۇرىنەن 48 ليتسەنزيا جەڭىپ الدى. جالپى، وليمپيادا ويىندارىنا دەيىن سپورتتىڭ 25 تۇرىنەن 100 دەن استام ليتسەنزياعا يەلىك ەتۋ جوسپارلانعان.

ايتا كەتەرلىگى، ەلىمىزدىڭ باستى سپورتتىق ۆەدومستۆوسى وسى جولى قانشا سپورتىمىزدىڭ جۇلدەگەر اتاناتىندىعىنا قاتىستى بولجام جاساۋدان اياق تارتىپ وتىر. «ەڭ ءبىرىنشى كەزەكتە بۇل سپورت بولعاندىقتان توسىن جايتتاردىڭ ءجيى بولاتىندىعىن قاپەرگە ۇستاۋ قاجەت. بارلىق قاتىسۋشىلار دا بۇل جارىسقا جىل بويى دايىندالادى. سوندىقتان باسەكەلەستىك وتە جوعارى. وزدەرىڭىز دە بىلەتىندەي، ەلىمىزدە بولاشاعى زور سپورتشىلار كوپ. بىرەۋىن بولە-جارا ايتۋ دۇرىس ەمەس. ەڭ باستىسى، بولجام جاسالعان سپورتشى قوبالجۋى مۇمكىن. ال مۇنىڭ بارلىعى دا ناتيجەگە ءوز اسەرىن تيگىزەدى. ياعني، سپورتشىنىڭ دايىندىق دەڭگەيىن وليمپيادا كورسەتەدى»، - دەپ حابارلادى مينيسترلىكتەن.

جالپى، قازاقستاندىق سپورتشىلاردىڭ دايىندىعىنا بارلىق جاعداي جاسالىپ، ولاردىڭ جاتتىعۋ جوسپارلارىنىڭ كەستەسى بەكىتىلگەن. قازىرگى ۋاقىتتا ليتسەنزيا ۇتىپ الۋ ءۇشىن كوپتەگەن سپورتشىلار الەم كۋبوكتارىنىڭ كەزەڭدەرىنە قاتىسىپ، قاجەتتى ۇپايلار جيناۋدا.

ايتا كەتەرلىگى، حالىقارالىق وليمپيادا كوميتەتى اككرەديتتەلگەن جۋرناليستەر ءۇشىن قازاقستانعا ورىن بەرىپ وتىر. وعان 2 فوتوگراف پەن اسسيستەنت جانە 8 جۋرناليست كىرەدى. ال رەسمي حابار تاراتۋ قۇقىعىنا يە قازاقستاندىق تەلەارنالار وزدەرىنىڭ ءتۇسىرىلىم توپتارىن ءىس ساپارعا جىبەرەتىن بولادى.

اۆتور: مارلان جيەمباي