قازاقستاندىق ەكس-شەنەۋنىك مۇرات وسپانوۆ جالپى ايىپپۇل سوماسىنىڭ تورتتەن ءبىر بولىگى 250 ميلليون تەڭگەنى تولەدى
سوت بيىلعى اقپاندا وسپانوۆقا 1 ميلليارد 101 ميلليون 60 مىڭ تەڭگە كولەمىندەگى ايىپپۇل تۇرىندەگى جازا كەسكەن بولاتىن.
بۇدان كەيىن وسى جىلدىڭ ناۋرىز ايىندا مۇرات وسپانوۆقا ايىپپۇلدى التى ايعا ءبولىپ تولەۋگە مىندەتتەمە قويىلدى. بۇل شەشىمدى استانا قالاسىنىڭ ەسىل اۋداندىق №2 -سوتى شىعاردى، سوتتالۋشىنىڭ ادۆوكاتتارى ءبولىپ تولەۋ تۋرالى ءوتىنىشتى وسى سوتقا بىلدىرگەن بولاتىن.
استانا قالالىق مامانداندىرىلعان اۋدانارالىق قىلمىستىق سوتىنىڭ باسپا ءسوز قىزمەتى وكىلدەرىنىڭ ايتۋىنشا، ايىپپۇل سوماسى ءبولىپ تولەنىپ جاتىر. قاراجاتتىڭ ءبىرىنشى بولىگى وسى جىلدىڭ ءساۋىر ايىندا 129 ميلليون 360 مىڭ تەڭگە كولەمىندە توگىلدى.
مامىر ايىندا 358 مىڭ 200 تەڭگە كولەمىندە تاعى دا تولەندى. ال وسى ايدا 75 ميلليون 140 مىڭ 362 تەڭگە جانە 499 مىڭ 490 تەڭگە كولەمىندە ەكى ترانش وتكىزىلدى. وسى اپتادا، 30 -ماۋسىمدا سوتقا 50 ميلليون تەڭگە سوماسىندا تۇبىرتەك كەلىپ ءتۇستى. بۇگىنگە دەيىن تولەنگەن قارجى - 255 ميلليون 358 مىڭ 052 تەڭگە. وسىلايشا وسپانوۆ ايىپپۇلدىڭ جالپى سوماسىنىڭ تورتتەن ءبىر بولىگىن تولەپ قويدى.
ەسكە سالا كەتەيىك، مۇرات وسپانوۆ ءومىرىنىڭ سوڭىنا دەيىن مەملەكەتتىك قىزمەتتە لاۋازىمعا يە بولۋ قۇقىعىنان ايىرىلعان بولاتىن. وعان تيەسىلى مۇلىكتىڭ بارلىعى تاركىلەنەدى. ونىڭ ءىسىن قاراعان سۋديا ەربول راحىمبەكوۆ قازاقستان پرەزيدەنتىنە مۇرات وسپانوۆتى "قۇرمەت" وردەنى مەملەكەتتىك ماراپاتىنان ايىرۋ تۋرالى ۇسىنىس كەلتىرۋ قاجەتتىگىن دە اتاپ وتكەن بولاتىن.
تابيعي مونوپوليالاردى رەتتەۋ اگەنتتىگىنىڭ بۇرىنعى ءتوراعاسى مۇرات وسپانوۆ "اتىراۋ جارىق" ا ق ءۇشىن ەلەكتر قۋاتىن بەرۋ مەن تاراتۋ ءتاريفىن بەكىتۋدە دەلدال ارقىلى بوپسالاۋ جولىمەن اسا ءىرى كولەمدە پارا العان دەپ ايىپتالدى.
پارا بەرگەنى ءۇشىن سوتتا "اتىراۋ جارىق" ا ق مۇددەسىنە قىزمەت ەتكەن كاسىپكەر ارمان اقتاي جاۋاپ بەردى، ول شەنەۋنىككە پارا بەرۋگە ءماجبۇر بولعانىن ايتتى. سوتتىڭ شەشىمىمەن اقتاي قىلمىستىق جاۋاپكەرشىلىكتەن بوساتىلدى.
