تولەبي اۋدانىنداعى بلوكپوستاردان 2500 گە تارتا كولىك كەرى قايتارىلدى

تولەبي. قازاقپارات - تۇركىستان وبلىسىنداعى تابيعاتى اسەم تولەبي اۋدانىندا بىركولىك، قاسقاسۋ تاۋ شاتقالدارىندا ورنالاسقان دەمالىس ورىندارىنا باراتىن جولدارعا بلوكپوستار قويىلدى.

قاتاڭ كارانتين تالاپتارىن ساقتاۋدى قامتاماسىز ەتۋ ماقساتىندا قويىلعان بلوكپوستاردان دەمالىس كۇندەرى 2500 گە تارتا كولىك كەرى قايتارىلدى، دەپ حابارلايدى قازاقپارات ءتىلشىسى.

وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، دەمالۋعا كەلۋشى ازاماتتاردىڭ كوبى شىمكەنت قالاسىنىڭ تۇرعىندارى ەكەنى انىقتالدى. سونىمەن قاتار، زاڭسىز جۇمىس ىستەپ تۇرعان 17 دەمالىس ورنىنىڭ قوجايىندارىنا ءىس- قۇجاتتار جيناقتالىپ، اكىمشىلىك حاتتتامالار تولتىرىلدى. سونداي- اق، سۋ جاعالاۋىندا شومىلىپ جۇرگەن جانە قاۋىپسىزدىك شارالارىن ساقتاماعان 37 ازاماتقا ق ر ا ق ب ت ك- ءنىڭ 364-بابىمەن «جالپى سۋ پايدالانۋ ەرەجەلەرىن بۇزۋ» بويىنشا ەسكەرتۋ جاسالدى.

ودان بولەك، بيلىك وكىلىن قورلاعان ازاماتتارعا دا شارالار قولدانىلدى. ماسەلەن، بىركولىك اۋىلىنا كىرەبەرىس جەردەگى بلوكپوستا پوليتسەيلەر «تويوتا» ماركالى اۆتوكولىكتى توقتاتىپ، ءتۇسىندىرۋ جۇمىستارىن جۇرگىزگەن. الايدا كولىك ىشىندەگى ەكى جاس جىگىت ءتارتىپ ساقشىلارىن تىڭداماستان، ولاردى جۇرتتىڭ كوزىنشە بالاعاتتاعان. اتالعان جايتقا بايلانىستى ق ر ق ك- ءنىڭ 378-بابىمەن «بيلىك وكىلىن قورلاۋ» ارەكەتى بويىنشا قىلمىستىق ءىس قوزعالعان.