قازاقستان بيىل 25,5 ميلليارد دوللاردىڭ تاۋارىن ەكسپورتتادى
«الدىن الا قورىتىندى بويىنشا 2023 -جىلعى قاڭتار- ساۋىردە سىرتقى ساۋدا تاۋار اينالىمى 11,1 پايىزعا ارتىپ، 44,4 ميلليارد دوللاردى قۇرادى. ەكسپورت 25,5 ميلليارد دوللاردى قۇرادى. بۇل رەتتە وڭدەلگەن تاۋارلار ەكسپورتى 7,5 پايىزعا ۇلعايىپ، 8 ميلليارد دوللارعا جەتتى. تاۋارلار يمپورتى 18,9 ميلليارد دوللاردى قۇرادى. جالپى، وڭ ساۋدا بالانسى 6,6 ميلليارد دوللارعا تەڭ»، - دەدى مينيستر.
وسى جىلدىڭ قاڭتار- مامىرىندا ەل ەكونوميكاسى 4,5 پايىزعا ءوستى.
«ۇلتتىق ستاتيستيكا بيۋروسىنىڭ اقپاراتىنا سايكەس، بيىل وتكەن جىلدىڭ قاڭتار- مامىرىمەن سالىستىرعاندا قازاقستان ەكونوميكاسى 4,5 پايىزعا ءوستى. ونىڭ ىشىندە ناقتى سەكتورداعى ءوسىم - 3,6، ال قىزمەت كورسەتۋ سالاسىندا 4,9 پايىزدى قۇرادى. نەگىزگى سالالاردىڭ بارلىعىندا وڭ ديناميكا بايقالۋدا، اسىرەسە قۇرىلىس، ساۋدا، سونداي- اق اقپارات جانە بايلانىس ەڭ جوعارى ءوسىمدى كورسەتتى. نەگىزگى كاپيتالعا سالىنعان ينۆەستيتسيالاردىڭ ءوسۋ قارقىنى 17,2 پايىزدى قۇرادى»، - دەدى مينيستر.
ونىڭ دەرەگىنشە، ينۆەستيتسيالار اعىنى كولىك جانە قويمالاۋدا - 56,1، اۋىل شارۋاشىلىعىندا - 30,8، جىلجىمايتىن مۇلىككە قاتىستى وپەراتسيالاردا – 3، سونداي- اق ونەركاسىپتە - 15,7، ونىڭ ىشىندە تاۋ- كەن ءوندىرۋ ونەركاسىبىندە - 13,4 جانە وڭدەۋ ونەركاسىبىندە 2,8 پايىزعا ارتتى.
«وڭىرلەر اراسىندا ەڭ جوعارعى ءوسىم تۇركىستان، ماڭعىستاۋ، قىزىلوردا جانە قوستاناي وبلىستارىندا بايقالدى»، - دەدى الىبەك قۋانتىروۆ.
اۆتور:
مارلان جيەمباي
