قازاق سەريالىنىڭ ءبىر ءبولىمى 25 مىڭ دوللار، ءۇندى سەريالىنىڭ ءبىر سەرياسى 350 دوللار تۇرادى - ل. تانىسباي

 استانا. قازاقپارات - بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارىت اسقار مىرزاحمەتوۆتىڭ توراعىلىعىمەن پارتيا جانىنداعى ب ا ق وكىلدەرىمەن قارىم- قاتىناس جونىندەگى كەڭەستىڭ العاشقى وتىرىسى ءوتتى.

قازاقستانداعى تەلەارنا مەن باسىلىمداردىڭ ءبىرىنشى باسشىلارى ويلارىن ايتقان كەڭەس بارىسىندا «استانا» تەلەارناسىنىڭ باس ديرەكتورى ءلاززات تانىسباي قازاقستاننىڭ تەلەسەريالدارى ءۇندى سەريالدارىنا قاراعاندا جاقسى رەيتينگ جيناعانىن ءمالىم ەتتى.

سوڭعى جىلدارى زورلىق- زومبىلىق پەن قىلمىستى تەك جەكەمەنشىك تەلەارنالار ناسيحاتتايدى دەگەن ءۇردىس قالىپتاستى. مەملەكەتتىك تەلەارنالاردىڭ ايتەۋىر باعىت- باعدارى، بولىنەتىن قارجىسى بار. ال، جەكەمەنشىك تەلەارنالار جارنامانىڭ ەسەبىنەن كۇن كورۋگە ءماجبۇر. ءبىزدى «ءۇندى سەريالدارىن نەگە كورسەتەسىڭدەر؟» دەپ سىنايتىندار كوپ. كەشىرىڭىزدەر، تەلەارنالاردىڭ توپ مەنەدجەرلەرى وسى ءۇندى سەريالدارىن قاتتى جاقسى كورەدى دەيسىزدەر مە؟ جوق، ءۇندى سەريالدارى بىزگە جوعارى رەيتينگ بەرەدى. رەيتينگ جارناماعا جول اشادى، ال سول جارنامادان تۇسكەن قاراجاتتان مەن قولاستىمداعى قىزمەتكەرلەرگە جالاقى تولەيمىن. تەلەارنالاردىڭ توپ مەنەدجەرلەرى وسى رەيتينگتىڭ قۇلى بولىپ وتىرمىز، ونى مويىندايمىن»، - دەيدى ل. تانىسباي.

دەگەنمەن، ل. تانىسبايدىڭ ايتۋىنشا، ەگەر قازاق تەلەسەريالىن تۇسىرسە، ول مىندەتتى تۇردە رەيتينگ جيناي الادى.

 «بيىل ءبىز ەكى تەلەسەريال ءتۇسىرۋ تۋرالى مەملەكەتتىك تاپسىرىس الدىق. ەكى سەريال دا ارنامىزدا ەڭ جوعارعى رەيتينگكە يە بولدى. بايقاعانىمىز - كورەرمەندەر وتاندىق سەريالدى كورۋگە وتە ىنتالى. ءبىراق، ماسەلە مۇندا - ءبىز قازاقستاننىڭ تەلەسەريالىن ءتۇسىرۋ ءۇشىن ءبىر سەرياسىنا 20-25 مىڭ دوللار جۇمسايمىز. ال، سول باياعى ءۇندى سەريالىنىڭ ءبىر سەرياسىن ءبىز 350 دوللارعا ساتىپ الامىز. باعادا ايىرماشىلىق بار ما؟» - دەدى ل. تانىسباي.

 ال، جالپى، جيىن بارىسىندا بەلگىلى بولعانداي، اقپارات جانە بايلانىس كوميتەتى بيىل وتاندىق تەلەارنالارعا 15 تەلەسەريال ءتۇسىرۋ ءۇشىن مەملەكەتتىك تاپسىرىس بەرگەن ەكەن.

 «ەكىنشىدەن، زاڭ بويىنشا ءبىزدىڭ سالا تاڭعى ساعات 06.00-دەن كەشكى ساعات 22.00-گە دەيىن زورلىق- زومبىلىقتى ناسيحاتتايتىن ونىمدەردى كورسەتۋگە قاقىمىز جوق. ءبىز سياقتى تەلەارنالار بۇل زاڭدى ورىندايدى. ءبىراق، ورىندامايتىن دا تەلەارنالار بار. قازاق تىلىندە شىعارىلاتىن ونىمدەر %50- دان تومەن بولماۋى كەرەك. بۇل زاڭدى دا ورىنداماي وتىرعان ارنالار بار. سوندىقتان، مەملەكەتتىك ورگان زاڭدى بۇزعان ارنالاردى جازالامايىنشا، بۇل قۇبىلىس جالعاسا بەرەدى»، - دەپ تۇيىندەدى ويىن ل. تانىسباي.

اۆتور: كەنجەكەي توقتامۇرات قىزى