قازاقتىڭ 25 جاستاعى جىگىتى 2 ميلليون دوللار تابىسىن قاتەرلى ىسىكپەن كۇرەسكە جۇمسادى
جاس مامان بار اقشاسىن قاتەرلى ىسىكپەن كۇرەس بويىنشا زەرتتەۋگە ءبولدى. بۇل تۋرالى اسحات بلوگەر بوتا جۇمانوۆاعا بەرگەن سۇحباتىندا ايتتى.
«جوبالارداعى تۇپكىلىكتى ماقساتىم - اقشا ەمەس، مەن ءۇشىن بۇل جاڭا تاجىريبە، جاڭا تانىستىق، جاڭا ءبىلىم مەن سىن الۋعا مۇمكىندىك قانا. بىزدە بانك توپ-مەنەدجەرلەرى اراسىندا بانك قىزمەتكەرلەرىنىڭ اقشانى قايدا جۇمسايتىنىمىز جايلى بەيرەسمي اڭگىمە بولدى.
بارلىعى تەمەكى، تۇنگى كلۋب، ياحتا دەگەن سياقتىلار دەپ ويلايدى. الايدا Barclays توبىنداعى كوپشىلىگى سالاۋاتتى ءومىر سالتىن ۇستانادى، مارافوندا جۇگىرەدى، ەرىكتىلەر اراسىندا قىزمەت ەتەدى. جالپى، سول كەزدەسۋدە بارلىق گونورارىمدى الەمدىك ماڭىزى بار پايدالى ىسكە بەرەتىنىمدى ايتتىم. مەن قاراجاتتى قاتەرلى ىسىك سالاسىنداعى زەرتتەۋلەرمەن اينالىساتىن حالىقارالىق ۇيىمعا قۇيدىم. بانك توپ-مەنەدجەرلەرى مەنىڭ ءار فۋنتىم ءۇشىن وزدەرىنىڭ ەكى فۋنتتارىن ۇستىنەن قوساتىنىن ايتتى»، - دەدى مامان.
«مەن ميلليون تابىس تاپقان ادامداردىڭ ەكىنشى ميلليونعا دا شاماسى جەتەتىنىنە سەنىمدىمىن. بۇل ءومىردىڭ باستى ماقساتى ەمەس قوي. ماقسات اقشادان جوعارى بولۋى كەرەك»، - دەپ مالىمدەدى ول.
قازىرگى ۋاقىتتا اسحات دارىندى قازاقستاندىقتارعا جۇمىس ىزدەپ، ولاردى جۇمىسقا ورنالاستىرۋمەن اينالىساتىن ستارتاپتىڭ نەگىزىن قالاۋشىلاردىڭ ءبىرى. جاس ماماننىڭ ايتۋىنشا، ونىڭ ماقساتى - قازاقستاندا مۇمكىندىگى جوعارى بارلىق ادامدى ءبىر الاڭعا جيناپ، ەڭبەك نارىعىندا ولارعا ۇزدىك مۇمكىندىكتەردى اشۋ.
ايتا كەتەيىك، وتكەن جىلى اسحات Twitter كومپانياسىندا جۇمىس ىستەدى. سول كەزدە ول Esquire Kazakhstan جۋرنالىنا بەرگەن سۇحباتىندا Google كومپانياسىنىڭ اتقارۋشى ديرەكتورى قىزمەتىنە دەيىن كوتەرىلۋدى ارماندايتىنىن ايتقان بولاتىن.
tengrinews.kz
