بۇقتىرمادا 24 ادامدى قۇتقارىپ قالعان ازاماتتاردىڭ ءبىرى وقيعانىڭ ءمان-جايىن ايتىپ بەردى
ابىروي بولعاندا، مۇنى سول ماڭدا سكۋتەرمەن جۇرگەن 4 ەر ادام بايقاپ قالىپ، كومەككە كەلگەن. وقيعانىڭ قالاي بولعانىن جىگىتتەردىڭ ءبىرى قازاقپارات تىلشىسىنە ايتىپ بەردى. اسقار سايلاۋبايەۆ، داۋلەت سايلاۋبەكوۆ، دامير مۇحاماديەۆ پەن سۇلتان تايجانوۆ بۇقتىرما سۋ قويماسى جاعالاۋىنىڭ بويىندا ورنالاسقان دەمالىس بازالارىنىڭ بىرىنە وتكەن جۇما كۇنى، ياعني 15-شىلدەدە كەلگەن.
«17-شىلدە كۇنى ساعات 19:00 شاماسى. قاتتى جەل سوعىپ، جاڭبىر قۇيىپ تۇر. سكۋتەرمەن كەلە جاتقانبىز. كەنەت الدىمىزدا ءبىر جاعىنا اۋدارىلىپ جاتقان كەمەنى كوردىك. ويلاناتىن ۋاقىت بولعان جوق، دەرەۋ كومەككە ۇمتىلدىق»، - دەيدى اسقار سايلاۋبايەۆ.
بەلگىلى بولعانداي، بۇل جولاۋشىلار تاسىمالدايتىن كەمە «سادكو» دەمالىس بازاسىنان «ايۋدا» بازاسىنا قاراي ءجۇرىپ كەلە جاتقان. بورتتا 24 ادام، ناقتى ايتقاندا، 21 جولاۋشى جانە 3 ەكيپاج مۇشەسى بولعان. جىلدامدىعى سەكۋندىنا 20 مەترگە جەتكەن جەلدىڭ سالدارىنان كەمە اۋدارىلا باستادى. سكۋتەرمەن بارىپ، بىرنەشەۋىنە جيلەت بەردىك. كوپتەن بولەكتەنىپ قالعان 2 ادامدى قايتادان سول جەرگە جەتكىزىپ تاستادىق. قاسىمداعى جىگىتتەر سۋعا سەكىرىپ، سوندا قالدى دا مەن سكۋتەرمەن كەمە الىپ كەلۋگە كەتتىم. ونىڭ ايتۋىنشا، ادامداردىڭ كوبىسى ايەلدەر ەكەن. ارالارىندا 9 بالا بار. ولاردىڭ ىشىندە جىلاپ، ۇرەي باسقاندار دا كەزدەستى. ءتىپتى ءبىر مۇمكىندىگى شەكتەۋلى ەركەكتىڭ سىرقاتى قوزىپ كەتكەن.
«ءبىز تورتەۋىمىز دە «شىعىس ءسۇت» كومپانياسىندا جۇمىس ىستەيمىز. ءوزىم ديرەكتورمىن. كەمەمىز سول ماڭدا بولعان. بارىنشا تەز ايداپ كەلدىم. ادامداردى تاسي باستادىق. بارلىعى ەكى رەيس جاسادىق. مۇگەدەكتىگى بار ازاماتقا العاشقى كومەك كورسەتىلدى. ايتەۋىر، سوڭىندا تۇگەلدەي ءدىن امان جاعالاۋعا جەتكىزىلدى»، - دەدى 32 جاستاعى ەر ادام.
اۆتور: تالعاتجان مۇحامەتبەك ۇلى
