قازاقستاندىق 24 جۇك كولىگى ۋكراينادان شىعا الماي تۇر - ۇ ك پ
قازىر ۋكرايناداعى قازاقستاندىق جۇرگىزۋشىلەر ومىرىنە، سونىمەن قاتار كولىك كومپانيالارىنىڭ تاۋاردى جەتكىزۋ جانە ساقتاۋعا قاتىستى مىندەتتەمەلەرىنە قاۋىپ ءتونىپ تۇر.
«اتامەكەن» ۇ ك پ مالىمەتىنشە، قازىر 24 جۇك كولىگى ۋكراينادان شىعا الماي تۇر. ولاردىڭ كوبى كيەۆ وبلىسىندا تۇرىپ قالعان، 3 كولىكتىڭ عانا جۇگى جوق.
«ءبىز اقپاراتتى جەدەل جيناۋ ماقساتىندا جۇرگىزۋشىلەردىڭ بارلىق چاتىنا ارنايى، سالالىق قاۋىمداستىقتارعا فورمانى تاراتتىق. تۇسكەن اقپاراتتى ۋاكىلەتتى ورگاندارعا كەلگەن بويدا جىبەرىپ جاتىرمىز. سونداي-اق، ۆەدومستۆولارعا حات جولداپ، قازاقستاندىق تاسىمالداۋشىلاردىڭ ۋكراينا اۋماعىنان پولشا، بەلارۋس رەسپۋبليكاسى ارقىلى شىعۋى ءۇشىن «جاسىل ءدالىزدى» قامتاماسىز ەتۋ ماسەلەسىن رەسەي، بەلارۋس، ۋكراينا، پولشا جانە باسقا دا تاراپتارمەن پىسىقتاۋدى سۇرايمىز»، - دەدى «اتامەكەن» ۇ ك پ لوگيستيكا جانە تاسىمالداۋ دەپارتامەنتىنىڭ ديرەكتورى مۇرات امرين.
ۇ ك پ دەرەكتەردى جيناۋدى جالعاستىرادى. ەگەر ءسىز نەمەسە كولىك جۇرگىزۋشى ۋكراينادان شىعا الماي جاتسا، دەرەگىڭىزدى مىنا نومىرگە جولداۋدى سۇرايمىز: 1432، 77788701432+ (ۇ ك پ بايلانىس ورتالىعى).
