رەسەيلىك مي-24 تىكۇشاعىن ارمەنيانىڭ ازەربايجانمەن شەكاراسىندا اتىپ ءتۇسىردى

بۇل تۋرالى دۇيسەنبىدە رەسەي قورعانىس مينيسترلىگى مالىمدەدى، دەپ حابارلايدى قازاقپارات تاسس اگەنتتىگىنە سىلتەمە جاساپ.

«9- قاراشادا ماسكەۋ ۋاقىتىمەن 17:30 شاماسىندا ارمەنيا رەسپۋبليكاسىنىڭ اۋماعى بويىنشا 102- رەسەي اسكەري بازاسىنىڭ اۆتوكولونناسىمەن ناحيچيەۆان اۆتونوميالىق رەسپۋبليكاسىنىڭ (ازەربايجان رەسپۋبليكاسى) شەكاراسىنا جاقىن ورنالاسقان ەراسح ارميان ەلدى مەكەنىنىڭ جانىنداعى اۋە كەڭىستىگىندە رەسەيلىك مي-24 تىكۇشاعىنا ج ز ز ك- دان وق جاۋدىرعان. زىمىران سوققىسىنىڭ سالدارىنان تىكۇشاق باسقارۋدى جوعالتىپ، ارمەنياداعى تاۋلى ايماققا قۇلاعان»، - دەپ حابارلادى رەسەيلىك اسكەري ۆەدومستۆو.

«ەكى ادام قازا تاپتى. ورتاشا اۋىرلىقتاعى جاراقات العان بىرەۋى ورنالاسۋ اۋە ايلاعىنا ەۆاكۋاتسيالاندى»، - دەپ اتاپ ءوتتى قورعانىس مينيسترلىگىنەن.

مي-24 تىكۇشاعى ارمەنيانىڭ اۋە كەڭىستىگىندە، ۇرىس ايماعىنان تىس جەردە جىلجىمالى زەنيتتىك زىمىران كەشەنىنەن اتىلدى، دەپ حابارلادى رەسەي قورعانىس مينيسترلىگىنىڭ رەسمي وكىلى، گەنەرال-مايور يگور كوناشەنكوۆ.

ءوز كەزەگىندە، ازەرتادج حابارلاعانداي، وقيعاعا بايلانىستى ازەربايجان س ءى م مالىمدەمە جاسادى.

«ازەربايجان تاراپى كەزدەيسوقتىق سيپاتىنداعى جانە رەسەي تاراپىنا قارسى باعىتتالماعان وسى قايعىلى وقيعاعا بايلانىستى رەسەي تاراپىنان كەشىرىم سۇرايدى. ازەربايجان تاراپى قازا تاپقان ەكيپاج مۇشەلەرىنىڭ وتباسىلارىنا كوڭىل ايتادى جانە زارداپ شەككەندەردىڭ تەزىرەك ساۋىعىپ كەتۋىن تىلەيدى. ازەربايجاندىق تاراپ ءتيىستى وتەماقى تولەۋگە دايىن ەكەنىن مالىمدەيدى»، - دەلىنگەن ازەربايجان س ءى م مالىمدەمەسىندە.