قازگيدرومەت: شىلدەنىڭ 24 ءى كۇنگى اۋا رايى بولجامى
رەسپۋبليكانىڭ ءبىرقاتار ايماعىندا جاۋىن جاۋىپ، سولتۇستىك-باتىستا، كۇندىز سولتۇستىكتە جانە ورتالىقتا نايزاعاي ويناپ، جەل كۇشەيەدى. كەي جەرلەردە ءتىپتى بۇرشاق جاۋۋى دا ىقتيمال.
سونداي-اق رەسپۋبليكانىڭ ءبىرقاتار بولىگىندە شاڭدى داۋىل كوتەرىلۋى مۇمكىن. سولتۇستىك قازاقستان، قاراعاندى وبلىستارىندا تۇندە جەل كۇشەيىپ، جىلدامدىعى سەكۋندىنا 15-20 مەترگە، كۇندىز ەلدىڭ باسىم بولىگىندە سەكۋندىنا 15-20 مەترگە، ەكپىنى 23-28 مەترگە جەتەدى. بۇرشاق جاۋۋى دا ىقتيمال.
اقمولا، قوستاناي، شىعىس قازاقستان وبلىستارىنىڭ كەي بولىگىندە جەل سەكۋندىنا 15-23 مەتر جىلدامدىقپەن ۇيتقيدى. بۇرشاق جاۋۋى ىقتيمال. پاۆلودار، كۇندىز اقتوبە، الماتى وبلىستارىندا جەل سەكۋندىنا 15-25 مەتر جىلدامدىقپەن سوعىپ، پاۆلودار وبلىسىندا بۇرشاق جاۋۋى ىقتيمال.
جامبىل، تۇركىستان، قىزىلوردا وبلىستارىنىڭ كەي جەرلەرىندە جەل كۇشەيىپ، جىلدامدىعى سەكۋندىنا 15-20 مەترگە جەتەدى.
قىزىلوردا وبلىسىندا شاڭدى داۋىل كوتەرىلۋى مۇمكىن. كۇندىز، الماتى، اتىراۋ، ماڭعىستاۋ، قىزىلوردا، باتىس قازاقستان، قاراعاندى، شىعىس قازاقستان وبلىستارىنىڭ وڭتۇستىگىندە اپتاپ ىستىق بولادى.
قىزىلوردا، اتىراۋ وبلىستارىنىڭ باسىم بولىگىندە اقتوبە، جامبىل، باتىس قازاقستان، تۇركىستان، الماتى، قاراعاندى وبلىستارىنىڭ كەي جەرلەرىندە ءورت قاۋىپى ساقتالادى.
