قازاقپارات كۇنتىزبەسى: 24- ماۋسىم
ەستە قالار وقيعالار
1938-جىلى العاش رەت قازاق ك س ر جوعارعى كەڭەسى سايلاندى. جوعارعى كەڭەس مەملەكەتتىك بيلىكتىڭ ەڭ جوعارى ورگانى رەتىندە رەسپۋبليكاعا قاتىستى كەز-كەلگەن ماسەلەنى شەشۋگە جانە ءوز قاراۋىنا الۋعا وكىلەتتى بولدى.
1970 -جىلى الماتى سيركىنىڭ ۇجىمى قۇرىلدى. ونىڭ قۇرامىنا ماسكەۋ ەسترادا-سيرك ۋچيليشەسىن، ساراتوۆ جانە الماتى ەسترادا-سيرك ستۋديالارىن ەندى عانا بىتىرگەن تالانتتى ارتىستەر ەندى. ۇجىم العاش رەت ونەرىن 1970-جىلى 24- ماۋسىمدا سامارادا كورسەتتى.
وسى داتا الماتى سيركىنىڭ جانە جالپى قازاقستاندىق سيركتىڭ قۇرىلعان كۇنى سانالادى. سەبەبى بۇل - ەلىمىزدەگى العاشقى ترۋپپا بولدى.
1992 -جىلى تۇركىستان قالاسىندا قازاقستان مەن وزبەكستان رەسپۋبليكالارى اراسىنداعى دوستىق، ىنتىماقتاستىق جانە ءوزارا كومەك تۋرالى شارتقا قول قويىلدى.
1996 -جىلى قازاقستان رەسپۋبليكاسى ۇكىمەتىنىڭ 774№ قاۋلىسىمەن «قازاقستان رەسپۋبليكاسى تۇرعىندارىنىڭ دەنە دايارلىعىنىڭ پرەزيدەنتتىك تەستەرى» بەكىتىلدى.
2010 -جىلى تۇركيا رەسپۋبليكاسىنىڭ استاناسى انكارا قالاسىندا قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆقا ەسكەرتكىش ورناتىلدى. بيىكتىگى بەس مەتردەن اساتىن ەسكەرتكىش تۇرىك استاناسىنىڭ «گەنچليك پارك» ورتالىق جاستار ساياباعىنا قويىلدى. ءمۇسىننىڭ بيىكتىگى - 2 مەتر 60 سانتيمەتر.
ول تازا قولادان، ال تۇعىرى ءمارماردان جاسالعان. اۆتورى - گيۋرسەل چاتالتەپە.
2011 -جىلى استانادا سەربيا رەسپۋبليكاسىنىڭ قازاقستانداعى ەلشىلىگىنىڭ اشىلۋ ءراسىمى ءوتتى. ەلشىلىكتىڭ كەڭسەسى «رەديسسون» قوناق ءۇيىنىڭ 6-قاباتىندا ورنالاسقان.
2014 -جىلى قازاقستان رەسپۋبليكاسى مەن فيدجي رەسپۋبليكاسىنىڭ اراسىندا كولىكتىڭ بارلىق تۇرلەرىنىڭ يەلەرى ءۇشىن ۆيزالىق تالاپتاردى الىپ تاستاۋ تۋرالى كەلىسىمگە قول قويۋ كەلىسىلدى.
2016 -جىلى تاشكەنتتە شاڭحاي ىنتىماقتاستىعى ۇيىمى مەملەكەتتەر باسشىلارى كەڭەسىنىڭ شاعىن قۇرامداعى كەزدەسۋى ءوتتى. وعان قازاقستان پرەزيدەنتى نۇرسۇلتان نازاربايەۆ، وزبەكستان پرەزيدەنتى المازبەك اتامبايەۆ، قىتاي حالىق رەسپۋبليكاسىنىڭ ءتوراعاسى شي جينپيڭ، تاجىكستان باسشىسى ەمومالي راحمون، رەسەي فەدەراتسياسىنىڭ پرەزيدەنتى ۆلاديمير پۋتين قاتىستى. كەزدەسۋدىڭ نەگىزگى قورىتىندى قۇجاتى ش ى ۇ- نىڭ 15 جىلدىعىنا ارنالعان تاشكەنت دەكلاراتسياسى بولدى.
2017 -جىلى ءىرى ەۋروپالىق تەلەارنا - Euronews الماتى تۋرالى سيۋجەت ءتۇسىردى. «مەتروپوليتەنس» باعدارلاماسىندا قازاقستاننىڭ مادەني استاناسى - الماتى تۋرالى باياندالادى.
2018 -جىلى قازاقستاندىق ءمولدىر مەكەنبايەۆا 55 ك گ دەيىنگى سالماق دارەجەسىندە جانە ابسوليۋتتىك سالماقتا «Los Angeles Open» اشىق چەمپيوناتىندا دجيتۋ-دجيتسۋ بويىنشا 2 التىن مەدالدى جەڭىپ الدى. سپورتتان بولەك مەكەنبايەۆا اكتريسا رەتىندە تانىمال. ول «قازاق باتىرلارى» تاريحي تەلەۆيزيالىق سەريالىندا باستى ءرولدى سومداپ، «ليۋبوۆ پو ناسلەدستۆۋ» جانە «ساياحاتشى» فيلمدەرىنە تۇسكەن.
2018 -جىلى ارحەولوگتار اقتوبە ماڭىندا سيرەك كەزدەسەتىن ارحەولوگيالىق تابىسقا كەنەلدى. سارمات داۋىرىندەگى قازبالاردان بىردەن ءۇش قولا قازاندىق تابىلدى. ول بۇل جەردە تايپا كوسەمدەرىنىڭ جەرلەنگەنىن بىلدىرەدى. عالىمداردىڭ پايىمداۋىنشا، قازبالار ءبىزدىڭ ەرامىزعا دەيىنگى V- VI عاسىرلارعا تيەسىلى.
2018 -جىلى الماتى وبلىسىندا اتى اڭىزعا اينالعان پوليتسيا گەنەرالى ءابدىقادىر بولسامبەكوۆكە ەسكەرتكىش ورناتىلدى. 4,5 مەترلىك ەسكەرتكىش سارقان قالاسىنىڭ ورتالىعىنا قويىلدى. ءا. بولسامبەكوۆتىڭ ءبيۋستىن قازاقستاندىق ءمۇسىنشى ميرلان ازماعانبەتوۆ گرانيتتەن جاسادى. گەنەرال-مايور ءابدىقادىر بولسامبەكوۆ ەكى مايدانعا - ەكىنشى دۇنيەجۇزىلىك سوعىسقا جانە ميليتاريستىك جاپونيامەن جاۋىنگەرلىك ارەكەتتەرگە قاتىسقان.
1947 -جىلى سوعىستان ورالدى. ساياسي پارتيالارعا تىركەلىپ، پوليتسيادا قىزمەت ەتتى. ءابدىقادىر بولسامبەكوۆ كاسىبي مانسابىنىڭ بارلىق ساتىلارىنان ءوتىپ، سارقان اۋدانىنداعى پوليتسيا قىزمەتكەرىنەن پوليتسيا گەنەرال- مايورى دارەجەسىنە دەيىن جەتتى.
2019 -جىلى 11 جاسار ادەلينا مۇحامەتجانوۆا «American Protégé» حالىقارالىق بايقاۋىنىڭ 1- دارەجەلى لاۋرەاتى اتاندى. جاس ءانشى بايقاۋدا بىرنەشە كلاسسيكالىق تۋىندى ورىنداپ، الەمنىڭ 50 ەلىنەن كەلگەن انشىلەردىڭ بارلىعىن شاڭ قاپتىردى. «American Protege « - الەمدىك انشىلەردىڭ باسىن قوساتىن حالىقارالىق بايقاۋ. ۇمىتكەرلەردىڭ داۋىسى اۋديوتاسپامەن تىڭدالادى. جەڭىمپازدار نيۋ-يوركتەگى كارنەگي حولل عيماراتىندا ونەر كورسەتۋگە شاقىرىلادى.