ءوزىنىڭ 24 شاكىرتى الەم چەمپيونى اتانعان باپكەر تۇركىستان وبلىسىندا تۇرادى
شاردارا اۋدانىنىڭ ءتول تۋماسى ازيانىڭ 2004 -جىلعى ابسوليۋتتى چەمپيونى، قازاقستاننىڭ ەڭبەك سىڭىرگەن جاتتىقتىرۋشىسى. بۇگىنگى كۇنگە دەيىن ونىڭ 24 شاكىرتى دۇنيەجۇزىنىڭ چەمپيونى اتانسا، ولاردىڭ جەتەۋى ەكى دۇركىن الەم چەمپيوندىعىن جەڭىپ العان، دەپ حابارلايدى قازاقپارات.
ارمان قارسىبايەۆتىڭ «شاردارا» سپورت كلۋبى سوڭعى كەزدە قول كۇرەسىنەن الەمدى مويىنداتىپ ءجۇر. ازيا كۋبوگى جارىستارىندا 50, قازاقستان چەمپيوناتتارىندا 262 التىن مەدال يەمدەنگەن. سونداي-اق 32 شاكىرتى الەم چەمپيوناتىنىڭ جۇلدەگەرلەرى اتانسا، 26 سپورتشى الەم كۋبوگىنىڭ جەڭىمپازدارى بولدى.
باپكەردىڭ ايتۋىنشا، بۇل جەتىستىكتەرگە جەتۋ وڭاي بولعان جوق. جەڭىستەر تاباندى ەڭبەك پەن تىنىمسىز جاتتىعۋدىڭ ارقاسىندا كەلگەن.
«2000 -جىلدارى، ياعني 23 جاسىمدا الماتىداعى وقۋىمدى ءتامامداپ، تۋعان جەرگە ورالدىم. دايىن تۇرعان جۇمىس جوق. سودان قاراپ جۇرمەي شاكىتتەر تاربيەلەيىن دەپ شەشتىم. سپورت زالدارىن جالعا الا سالۋعا قارجى تاپشى. بولماعان سوڭ ءۇيىمنىڭ مال قوراسىن تازالاپ، رەتكە كەلتىردىم. جان-جاقتان كادەگە جارايدى-اۋ دەگەن تەمىر-تەرسەكتى جيناپ، قول كۇرەس توبىن قۇردىم. كوشەمىزدەگى بالالاردىڭ باسىن قۇراپ، سپورتتىڭ وسى تۇرىنە باۋلي باستادىم. ولار دا قۋانا كەلىستى. ويتكەنى مەن ول كەزدە قازاقستاننىڭ بىلدەي ءبىر چەمپيونى بولاتىنمىن. باستاپقىدا جاتتىعۋعا كەرەك زاتتارىمىزدى تابا الماي قينالدىق. شتانگالاردىڭ ورنىنا جىلۋ باتارەيالارىن قولدانعان كەزدەرىمىز دە بولدى. قالا بەرسە ەدەنگە كيىز توسەپ، سونىڭ ۇستىندە جاتتىعىپ جۇردىك. بىرتە-بىرتە قاتارىمىز كوبەيدى»، - دەيدى باپكەر.
وسىلايشا مال قورادان باستالعان جاتتىعۋ جۇيەلەنىپ، ورتا مەكتەپتىڭ جەرتولەسىندە جالعاسىن تاپتى. كەيىن كەلە شاكىرتتەرى ءتۇرلى جارىستارعا قاتىسىپ، شاقىرتۋلار الدى. الايدا ول كەزەڭدەردە جارىستارعا بارۋ ءۇشىن قاراجات تاپشىلىعى قولبايلاۋ بولادى. 2003 -جىلى شاكىرتتەرىنىڭ ءبىرى سەيفوللا نۇرحالىقوۆ گەرمانياداعى كاسىپقويلار اراسىنداعى الەم كۋبوگىنا شاقىرتۋ الادى. باپكەر وسى جارىسقا جىبەرەردە اقشادان قاتتى قىسىلعانىن ايتادى.
«دەمەۋشىلەر ىزدەپ كورىپ ەدىك، تابىلا قويمادى. ول كەزدە قول كۇرەسى دەگەن سپورتتى كوبىسى بىلە بەرمەيدى. سودان 82 شاكىرتىم جۇدىرىقتاي جۇمىلىپ، 11 كۇن بويى ماقتا تەردى. ولار اپتاپ ىستىقتا قارا جۇمىستان قاشقان جوق. قايتا ۇيىمداسىپ، ماقتادان تۇسكەن اقشاعا سەيفوللانى گەرمانياعا جەتكىزدىك. سەيفوللامىز دا ءبىزدى جەرگە قاراتپادى. سول جارىستان جەڭىسپەن ورالدى. ءوزىم دە 2004 -جىلى 27 جاسىمدا ەڭ اۋىر سالماقتا ازيا كۋبوگىنىڭ جەڭىمپازى اتاندىم. سول جىلى ازيا چەمپيوناتىنىڭ ءابسوليۋتتى جەڭىمپازى بولدىم. ال، 2005 -جىلى توكيودا وتكەن الەم چەمپيوناتىندا قولا مەدالدى مىسە تۇتتىم. «قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى» اتاعىنا قول جەتكىزدىم»، - دەيدى ارمان قارسىبايەۆ.
باپكەردىڭ جەڭىستەرى شاكىرتتەرىن دە جىگەرلەندىرە ءتۇستى. 2007 -جىلى شاكىرتتەرىنىڭ ءبىرى جازيرا اقبايەۆا الەم چەمپيوناتىنىڭ جەڭىمپازى اتاندى. ەرجان ءابىلدا، تالعاتبەك رۇستەمبەك، شىنبولات رايحانوۆ، قىدىرعالي وڭعاربايەۆ، ماعجان شاميەۆ، جازيرا اقبايەۆا، ەرداۋلەت نۇرماحاندار ەكى رەت الەم چەمپيوندارى اتانعان. ازيا چەمپيوناتتارىندا شاردارالىقتار 157 التىن مەدالعا يە بولسا، 128 سپورتشى قۇرىلىق بىرىنشىلىگىنىڭ كۇمىس، قولا جۇلدەلەرىنە قول جەتكىزگەن. بۇگىندە كلۋبىنان 1 «قازاقستان رەسپۋبليكاسىنىڭ ەڭبەك سىڭىرگەن سپورت شەبەرى»، 57 حالىقارالىق دارەجەدەگى سپورت شەبەرى، 95 سپورت شەبەرى، 2 «قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى» شىقتى. قازاقستاننىڭ ەرلەر قۇراماسىنىڭ نەگىزىن دە ارمان قارسىبايەۆ باپتايتىن شاردارا جىگىتتەرى قۇراپ وتىر.
«مەن قازىر شاكىرتتەرىممەن ماقتانامىن. بارلىعى دا اۋىلدىڭ تاربيەسىن العان. باسىم كوپشىلىگى ءبىر كوشەنىڭ بويىندا تۇرادى. كەرەك كەزدە ءبىر جاعادان باس، ءبىر جەڭنەن قول شىعارۋعا دايىن. كلۋبتاعى سپورتشىلاردىڭ باسىندا ءبىر جاعداي بولا قالسا، ءبارىمىز ءبىر كىسىدەي كومەك كورسەتۋگە تىرىسامىز. كوممەرتسيالىق جارىستاردان تۇسكەن اقشادان دا قور جيناپ، كەرەك كەزدە جاراتامىز. وسىنداي اۋىزبىرشىلىكتىڭ ارقاسىندا سپورت كەشەنىن اسارلاتىپ سالدىق. ءقازىر مۇندا 600 دەي سپورتشى جاتتىعادى. بىزگە تۇركىستان وبلىستىق سپورت باسقارماسىنىڭ باسشىسى الىبەك نۇرتايەۆ تا ۇنەمى قولداۋ كورسەتىپ تۇرادى»، - دەيدى باپكەر.
شاردارانىڭ شىمىر جىگىتتەرى سوڭعى ءۇش جىلدا دا جاقسى ناتيجەلەرگە قول جەتكىزدى. ولاردىڭ اراسىندا 2015 -جىلى - نۇرداۋلەت ايدارحان، تالعاتبەك رۇستەمبەك، شىنبولات رايحانوۆ، ەرجان ءابىلدا الەم چەمپيوناتىندا توپ جاردى. ال، 2016 -جىلى - نۇرداۋلەت ايدارحان، شىنبولات رايحانوۆ، قىدىر وسەرباي، ەرداۋلەت نۇرماحان، ەرجان ءابىلدا، تالعات اقتايەۆ الەمدىك جارىستا جەڭىمپاز اتاندى. 2017-جىلى - نۇرداۋلەت ايدارحان، قىدىر وسەرباي، تالعاتبەك رۇستەمبەك، تالعات اقتايەۆ، نۇرداۋلەت قادىر، ەرداۋلەت سارىباي، نۇرحان قادىر، قايىرحان شاميەۆتەر ءدال وسى كورسەتكىشتەردى قايتالاي ءتۇستى. وسناۋ سپورتشىلاردىڭ اراسىنان نۇرداۋلەت ايدارحان دۇنيەجۇزىلىك چەمپيوناتتا ءۇش رەت جەكە-دارا شىعىپ، «قازاقستان رەسپۋبليكاسىنىڭ ەڭبەك سىڭىرگەن سپورت شەبەرى» اتاندى.
