بيىلدان باستاپ ءسابيلى بولعاندار جاردەماقىنى 24 پايىزعا ارتىق الادى

استانا. قازاقپارات - ءماجىلىس «قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسىن ماقۇلدادى.

زاڭ جوباسىندا بالالى وتباسىلاردى مەملەكەتتىك قولداۋعا باعىتتالعان نورمالار قاراستىرىلعان، دەپ حابارلايدى Baq.kz.

«بىرىنشىدەن، بالا تۋۋىنا بايلانىستى بەرىلەتىن ءبىر جولعى جاردەماقى مولشەرىن 20 پايىزعا ارتتىرۋ كوزدەلىپ وتىر. جاردەماقىنىڭ مولشەرى بىرىنشى، ەكىنشى، ءۇشىنشى بالاعا 31,41-ايلىق ەسەپتىك كورسەتكىشتەن (ا ە ك) 38 ايلىق ەسەپتىك كورسەتكىشكە دەيىن، ال ءتورتىنشى جانە ودان كوپ بالاعا 52,35 ا ە ك- تەن 63 ا ە ك- كە دەيىن ارتاتىن بولادى.

ەلىمىزدە جىلىنا 400 مىڭداي بالا تۋاتىنىن ەسكەرسەك، شامامەن 300 مىڭنان استام وتباسى ارتتىرىلعان مولشەردە جاردەماقى الادى. ناتيجەسىندە 2017-جىلى جاردەماقىنىڭ مولشەرى وتكەن جىلمەن سالىستىرعاندا 24 پايىزعا ارتقالى وتىر»، - دەدى دۇيسەنوۆا.

ەسكە سالساق، بۇعان دەيىن ب ا ق- تا 2017-جىلدىڭ 1- شىلدەسىنەن باستاپ بالالارعا تولەنەتىن جاردەماقى كولەمى ارتاتىنى تۋرالى حابارلانعان بولاتىن. مالىمەتكە سايكەس، قازىرگى تاڭدا 1، 2، 3-شى بالالارعا 66 مىڭ 621 تەڭگە تولەنسە، 1- شىلدەدەن باستاپ بۇل سوما 86 مىڭ تەڭگەگە جەتەدى. ال 4- جانە ودان كوپ بالاعا 111 مىڭ 135 تەڭگە تولەنسە، 1- شىلدەدەن باستاپ 142 مىڭ تەڭگەدەن ارتىق تولەنەدى.

دۇيسەنوۆانىڭ ايتۋىنشا، زاڭ جوباسىن ىسكە اسىرۋ ءۇشىن رەسپۋبليكالىق بيۋدجەتتى ناقتىلاۋ كەزىندە 2017-جىلى قوسىمشا 81,6 ميلليارد تەڭگە قاراستىرىلدى. جوبانى جۇزەگە اسىرۋ ءۇشىن 11 زاڭعا، ونىڭ ىشىندە زەينەتاقى تۋرالى زاڭعا وزگەرىستەر مەن تولىقتىرۋلار ەنگىزۋ كوزدەلگەن.