تالدىقورعاننىڭ 24 جاستاعى تۇرعىنىنا دونور تابىلماي جاتىر - فوتو
24 جاستاعى بيجامالدىڭ قوس بۇيرەگى بىردەي ىستەن شىققاندىقتان وعان دونور قاجەت، دەپ حابارلايدى «قازاقپارات» ءتىلشىسى. ناۋقاستىڭ جاعدايى كۇننەن- كۇنگە ناشارلاپ بارادى. بۇيرەك السىزدىگىنەن قان قىسىمى ءجيى كوتەرىلىپ، تالىپ قالاتىن جاعدايعا جەتكەن. ول كەشە قالالىق كوپسالالى اۋرۋحانانىڭ جانساقتاۋ بولىمىندە جاتىپ، بەتى بەرى قارادى. ەندى بويجەتكەننىڭ ءومىرى گەموديالەز اپپاراتىنا (بۇل قاندى بۇيرەكتەن تىس تازارتۋ ادىستەرىنىڭ ءبىرى) تاۋەلدى.
ال بيجامال ەسەنبايەۆانىڭ اناسىنان باسقا جاقىن تۋىسى جوق. 63 جاستاعى اناسى دونور بولۋعا نيەتتى. الايدا، دەنساۋلىعى جارامايدى. ەگەر ول دونور كەزەگىنە تۇرسا، بىرنەشە جىل كۇتۋى قاجەت. بيجامالدى ەمدەگەن دارىگەر- نەفرەلوگ فاريدا ابلەيەۆا ۋاقىت وزدىرماي ناۋقاستىڭ بۇيرەگىن اۋىستىرۋ قاجەت دەپ وتىر. سەبەبى، قازىر بيجامال ەندى عانا باستاعان گەموديالەزدىڭ ءوزىن وتە اۋىر قابىلداۋدا. قان قىسىمى كوتەرىلىپ، ناۋقاس قاتتى قينالادى. كەيدە قان قىسىمى 280-گە دەيىن كوتەرىلەدى.
«بيجامالدىڭ بالا كۇنىنەن بۇيرەگى اۋىرادى. دەرتى اسقىنىپ، بۇگىندە وعان تەرمينالدى بۇيرەك جەتىسپەۋشىلىگى دياگنوزى قويىلىپ وتىر. وزدەرىڭىز بىلەسىزدەر بۇيرەكتى ەگەر ساتىپ الۋشىعا جانە ساتۋشىعا ەلىمىزدە جازا قاتاڭ. بەس جىلعا دەيىن سوتتالادى. سوندىقتان بيجامالعا ءوز ەركىمەن بۇيرەگىن بەرەتىن دونور تابىلسا دەيمىز»، - دەيدى دارىگەر.
اۆتور: سامال قابىشەۆا
