بيىلعى جىلى قازاقستان 24 مىڭ توننا ۋران ءوندىرۋدى كوزدەۋدە

استانا. قازاقپارات - 2016 -جىلى قازاقستان 24 مىڭ توننا ۋران ءوندىرۋدى كوزدەۋدە. بۇل تۋرالى بۇگىن حالىقپەن ەسەپتىك كەزدەسۋ وتكىزگەن ق ر ەنەرگەتيكا ءمينيسترى قانات بوزىمبايەۆ ءمالىم ەتتى.

«2015 -جىلى ۋران ءوندىرىسى 23 مىڭ 805 توننانى قۇرادى. 2016 -جىلدىڭ 4ايى ىشىندە 8,1 مىڭ توننا ۋران وندىرىلگەن. 2016 -جىلى  24080 توننا ۋران شىعارۋ جوسپاردا بار»، - دەپ حابارلادى ول.

ەنەرگەتيكا ءمينيسترى قازاقستان ۋران وندىرۋدە الەم بويىنشا كوشباسشى ەل ەكەندىگىن ەسكە سالا كەتتى. قازىرگى ۋاقىتتا الەمدەگى ۋراننىڭ 40 پايىزى قازاقستان جەرىنەن شىعىپ وتىر. شيكىزاتتىڭ وزگە تۇرلەرىنە قاراعاندا، ۋراننىڭ ءباسى جوعارى بولماق جانە دامۋ الەۋەتى دە مىقتى.

«سوندىقتان ءبىز بۇل سالانى ساقتاۋىمىز كەرەك. كوشباسشىلىعىمىزدى نىعايتا وتىرىپ، رەاكتورلى- يادرولىق وتىن تسيكلىنە دەيىن ءارتاراپتاندىرىلعان، اتوم ونەركاسىبىنىڭ كولدەنەڭ ىقپالداستىرىلعان كاسىپورىندار كەشەنىن قۇرۋىمىز كەرەك» ، - دەدى مينيستر.

 اۆتور: جاسۇلان جولدىبايەۆ