استانادا 24 جاستاعى جىگىت ەرەكشە كۇيمەلەر جاسايدى
Tengrinews.kz تىلشىسىنە بەرگەن سۇحباتىندا ول كۇيمەگە تۋريستەردى قىدىرتۋ ءۇشىن كاسىپكەرلەردىڭ كوپ تاپسىرىس بەرەتىنىن ايتتى.
جاس جىگىت ءوزىنىڭ العاشقى كۇيمەسىن 2012-جىلى جيناعان ەكەن، ال قازىر ونىڭ كولىكجايىندا وسىنداي توعىز كۇيمە جاسالىپتى. «العاشقىسىن جانۇيامىزبەن بىرگە جاسادىق. قازىر ءوزىم ۇيرەنىپ الدىم. ول كەزدە قانداي دا ءبىر كاسىپ باستاۋ كەرەك بولدى. ينتەرنەتتەن ادامداردىڭ كۇيمە جاسايتىنىن كوردىم. ال استانادا ات ۇستايتىن تانىستارىمىز بار. سوندىقتان دا وسى ىسپەن اينالىسىپ كورگىمىز كەلدى. ۇيلەنۋ تويىندا ليمۋزيندەر جالداپ جاتادى عوي، سوندىقتان كۇيمەلەرگە دە سۇرانىس بولادى دەپ ويلادىق. كۇيمەنى قالاي جاسايتىنى تۋرالى ۆيدەولار قاراپ ءجۇردىم، دەگەنمەن وندا تۇسىنىكسىزدەۋ بولدى. كەيىن بارلىعىن ءوزىم جاساۋىما تۋرا كەلدى. قاتەلىكتەر بولدى، بىرنەشە رەت قايتا جاسادىم، ءبىراق سوڭىندا ىڭعايلى نۇسقانى تاپتىق»، - دەدى ول.
ءبىر كۇيمەنى دايىنداۋ ءۇشىن ءانۋار ەكى اي ۋاقىت جۇمسايدى ەكەن. ول كوبىنە اعاش پەن مەتالل پايدالانىتىنىن ايتتى. مۇنداي كۇيمە شامامەن ءۇش ميلليون تەڭگەگە ساتىلادى. ونىڭ ايتۋىنشا، تۋىندىنى الماتى، بالقاش، قاراعاندى، شىمكەنت كاسىپكەرلەرى ساتىپ الىپتى. ءبىر كۇيمە رەسەيگە دە اكەتىلگەن ەكەن.
قازىر جاس جىگىت «كورول كۇيمەسىن» جاساۋدى جوسپارلاپ وتىر. «بۇل ۇلكەن جوبا بولعالى وتىر، ونى ساتپاۋىم دا مۇمكىن. وعان كوپ ۋاقىتىمدى بولەمىن، التىن تۇستەس بولعانىن قالايمىن»، - دەدى شەبەر.
