ەلباسى قازاقستان حالقى اسسامبلەياسىنىڭ 24 - سەسسياسىن اشتى - فوتو
بەيبىتشىلىك پەن كەلىسىم سارايىندا باستالعان شاراعا 1500-دەن استام ادام قاتىسۋدا.
ولاردىڭ قاتارىندا ەلىمىزدىڭ بارلىق وڭىرلەرىنەن كەلگەن اسسامبلەيا مۇشەلەرى مەن ارداگەرلەرى، رەسپۋبليكالىق، وڭىرلىك ەتنومادەني بىرلەستىكتەردىڭ ءتوراعالارى، پارلامەنت دەپۋتاتتارى، ورتالىق اتقارۋشى ورگانداردىڭ، ساياسي پارتيالاردىڭ، ءدىني بىرلەستىكتەردىڭ، ۇكىمەتتىك ەمەس ۇيىمداردىڭ باسشىلارى، جوعارى وقۋ ورىندارىنىڭ رەكتورلارى، شەت مەملەكەتتەردىڭ ديپلوماتيالىق ميسسيالارىنىڭ وكىلدەرى، عىلىمي، شىعارماشىلىق جانە ينتەلليگەنتسيا وكىلدەرى قاتىسىپ جاتىر.
ەستەرىڭىزگە سالا كەتسەك، كەشە ق ر مەملەكەتتىك حاتشىسى گۇلشارا ءابدىقالىقوۆانىڭ قاتىسۋىمەن قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسى وتكەن بولاتىن. القالى جيىن بارىسىندا ول حالقىمىز ءۇشىن اسسامبلەيانىڭ بۇل سەسسياسى تاعدىرشەشتى بولاتىندىعىن باسا ايتقان ەدى.
«ول اسسامبلەيا تاريحىنداعى ماڭىزدى كەزەڭ بولادى. بىرىنشىدەن، سەسسيانىڭ «تاۋەلسىزدىك. كەلىسىم. بولاشاعى ءبىرتۇتاس ۇلت» دەپ اتالاتىن كۇن ءتارتىبى قازاقستاندى جاھاندىق ترانسفورماتسيا مەن ەكونوميكالىق تۋربۋلەنتتىك كەزەڭىندە تابىستى دامىتۋدىڭ شارتى رەتىندە بەيبىتشىلىك پەن كەلىسىمدى نىعايتۋدىڭ ماڭىزدىلىعىن كورسەتەدى. ەكىنشىدەن، سەسسيا بارىسىندا 5 ينستيتۋتتىق رەفورمانىڭ «بىرەگەيلىك پەن بىرلىك» اتتى ءتورتىنشى باعىتىن جۇزەگە اسىرۋدىڭ ارالىق قورىتىندىسى شىعارىلادى. سونىمەن قاتار مەملەكەت باسشىسىنىڭ «ماڭگىلىك ەل» جالپى ۇلتتىق پاتريوتتىق يدەياسىن جۇزەگە اسىرۋ تۋرالى ەسەبى تىڭدالادى. ۇشىنشىدەن، سەسسيا قازاقستان تاۋەلسىزدىگىنىڭ 25 جىلدىعى جىلىندا وتەدى جانە بۇل تاقىرىپ كۇن ءتارتىبىن ايقىنداۋشى بولادى»، - دەگەن ەدى گ. ءابدىقالىقوۆا.
