ن. نازاربايەۆ: نەبارى 24 جىلدا قارىشتاپ جاڭالانعان، تورتكۇل دۇنيە باعالاعان ەل بولدىق
«ەلۋ جىلدا ەل جاڭا» دەگەن حالىق دانالىعىن بارشاڭىز بىلەسىزدەر. دەسە دە، ءبىز 50 ەمەس نە ءبارى 24 جىلدا قارىشتاپ جاڭالانعان، تورتكۇل دۇنيە باعالاعان ەل بولدىق. وزگەلەر عاسىرلاپ وتەتىن، ال ەندى بىرەۋلەر مۇلدەم ماقۇرىم كەتەتىن تاريحي جولدى بار بولعانى شيرەك عاسىرعا جەتپەي-اق ءتامامدادىق. ول دا بولسا - كەشەگى بابالار ەرلىگىنىڭ رۋحىن العان، ەرتەڭگى ۇرپاعىنا جول سالعان بۇگىنگى زامانداستارىمىزدىڭ، سىزدەر مەن بىزدەردىڭ ەسەلى ەڭبەكتەرىمىزدىڭ ارقاسى. «رۋحى ءبىر - قانداس، جۇرەگى ءبىر - جانداس» دەيدى دانا حالىق»، - دەدى مەملەكەت باسشىسى.
ەلباسى ءوز سوزىندە ەگەمەندىك تۇسىندا ەلدىگى بەكەم، تۇعىرى بيىك جۇرت بولۋعا بۇگىنگى سالتاناتتى شاراعا قاتىسۋشىلاردىڭ دا قوسقان ۇلەستەرى قوماقتى دەپ سانايتىندىعىن باسا ايتتى.
«حالقىمىزدا «جەڭدەس اعايىن باسپاناسىمەن، دەربەس حالىق استاناسىمەن ماقتانادى» دەگەن ءسوز بار. كەلگەن قوناق ۇيگە كىرىپ، يەسىن سىناسا، وزگە جۇرت ورداسىن كورىپ، ەلىن تانيدى. سول ءۇشىن دە قاي قازاقتىڭ جان جۇرەگىم دەپ مارقاياتىن دا، ءوز سارايىم دەپ ايتا الاتىن دا دارابوز، اقوردالى، بيىك بايتەرەكتى، سامالداي كەڭ شاتىرلى استاناسى بار. تاۋەلسىز قازاقستانى بار»، - دەدى ن. نازاربايەۆ.
اۆتور: مارلان جيەمباي
