بيىل شەت ەلدەردە سوتتالعان 24 قازاقستاندىق ەلىمىزدەگى تۇرمەلەرگە اۋىستىرىلدى
بۇل تۋرالى بۇگىن پارلامەنت سەناتىنىڭ جالپى وتىرىسىندا ق ر باس پروكۋرورىنىڭ ورىنباسارى جاقىپ اسانوۆ ءمالىم ەتتى.
باس پروكۋرور ورىنباسارىنىڭ ايتۋىنشا، قازىرگى تاڭدا قازاقستاننىڭ شەت مەملەكەتتەرمەن قىلمىستىق ىستەر بويىنشا جاساسىپ جاتقان شارتتارى نەگىزىنەن ءۇش باعىتتى قۇرايدى. بۇلار: قۇقىقتىق كومەكتەر كورسەتۋ، ادامداردى ءوزارا بەرۋ جانە سوتتالعانداردى قايتارۋ تۋرالى شارتتار.
«ستاتيستيكالىق مالىمەتتەرگە سۇيەنسەك، تەك وسى اعىمداعى جىلدىڭ وزىندە قازاقستان قۇقىقتىق كومەكتەر كورسەتۋ بويىنشا شەت ەلدەردەن تۇسكەن 599 سۇراۋ سالۋعا جاۋاپ بەردى. سونىمەن ءبىر مەزەتتە ءبىزدىڭ ەلىمىز شەت مەملەكەتتەرگە سۇراۋلار سالىپ، ولار 538 رەسمي ءوتىنىشىمىزدى ورىندادى.
سونىمەن قاتار ءبىز شەت ەلدەرگە ءتۇرلى قىلمىستار جاساعان 95 تۇلعانى بەردىك. ال شەت ەلدەردەن بىزگە 80 تۇلعا بەرىلدى. بۇدان بولەك، سوتتالعانداردى بەرۋ بويىنشا قازاقستاننىڭ تۇرمەلەرىنەن جازاسىن وتەپ جاتقان 75 سوتتالۋشى شەت مەملەكەتتەرىنىڭ سۇراتۋى بويىنشا بەرىلدى. ال شەت مەملەكەتتەردەگى تۇرمەلەردە جازاسىن وتەپ جاتقان 24 قازاقستاندىقتى ءوزىمىزدىڭ تۇرمەلەرىمىزگە اۋىستىردىق»، - دەدى جاقىپ اسانوۆ.
ونىڭ ايتۋىنشا، بۇگىنگى كۇنى الەم ەلدەرىمەن جاسالىپ جاتقان ءوزارا قۇقىقتىق كومەك تۋرالى كەلىسىم شارتتارىنىڭ ماڭىزى زور.
اۆتور: قانات مامەتقازى ۇلى
