جەڭىسكە دەيىن 24 كۇن: كەڭەس اسكەرى ۆەنگريا جانە اۆستريا نەمىستەرىن تالقاندادى
«قازاقپارات» ح ا ا وقىرماندار نازارىنا سول سۇراپىل جىلداردىڭ وقيعالار جىلناماسىنا ۇسىنادى.
زەملانديالىق تۇبەك. كەنيگسبەرگتىڭ سولتۇستىك- باتىس جانە باتىس قالالارىندا ءبىزدىڭ اسكەر شابۋىلدى جالعاستىرىپ جاتتى. كەڭەس تانكيستەرى مەن جاياۋ اسكەرى جاۋعا تويتارىس بەرىپ، ەكپىندى ارەكەتپەن سانكت لورەنتستىڭ باتىس ەلدى مەكەنىندەگى ورمانعا شىقتى. نەمىستەر بۇل اۋدانعا كوپتەگەن ارتيللەريالارىن شوعىرلاندىرعان ەدى. بۇدان باسقا، تەمىر جول بويىنشا، جاعالاۋدا نەمىس بروندى پويىزى كەلە جاتتى. كۇتپەگەن جەردەن تاپ بەرگەن ءبىزدىڭ اسكەرلەردىڭ سوققىسى ساقاداي- ساي قارسىلاس قورعانىسىن كۇل- تالقان ەتتى. جاۋ پويىزى ىستەن شىقتى. ءبىر ۋاقىتتا جاۋدىڭ ارتيللەريالىق پوزيتسياسى تالقاندالدى.
جاۋدى ەڭسەرگەن ءبىزدىڭ اسكەر 15 شاقىرىمعا العا وزىپ، زەملانديالىق تۇبەكتىڭ سولتۇستىك- باتىس بولىگىن نەمىستەردەن تازارتتى. فريش- گاف شىعاناعىنىڭ ماڭىنداعى ورماندا كەسكىلەسكەن ايقاس ءجۇردى. بۇل جەردە ءبىزدىڭ اسكەر ون ەكى قارسى شابۋىلدى ەڭسەردى، ءبىرقاتار تەمىر بەتون دوتتار مەن بەرىك تىرەك پۋنكتتەرىن باسىپ الدى. گيتلەرشىلەر فيشحاۋزەن قالاسىنان 12 شاقىرىمدا ورنالاسقان ادليح پوۆايەن ەلدى مەكەنىنەن قۋىلدى.
ءبىر كۇن ىشىندە 5 مىڭنان استام نەمىس ساربازدارى مەن وفيتسەرلەرى جويىلدى. ءبىزدىڭ اسكەر 8 ۇشاق، 137 قارۋ، 46 مينومەت، 490 پۋلەمت، 10 پاروۆوز، 405 تەمىر جول پلاتفورمالارى مەن ۆاگوندار، سونداي- اق اسكەري مۇلىكتەر، وق- دارىلەرمەن 22 قويمانى تاركىلەدى. 60 قا جۋىق ەلدى مەكەندى باسىپ الدى.
اۆستريا. 2- ۋكراينا مايدانىنىڭ اسكەرى جاۋدىڭ بەرىسپەي قارسىلاسقان شابۋىلىن تويتارىپ، ۆەنا سولتۇستىگىنە 10 شاقىرىمدا ورنالاسقان كورنەيبۋرگ قالاسىنا شىعىستان تاپ بەردى. ءبىر ۋاقىتتا 3- ۋكرايندىق مايدان ءبولىمى دۋناي ارقىلى ءوتىپ، وڭتۇستىكتەن كورنەيبۋرگكە جەتتى. كوشە ۇرىسىنىڭ ناتيجەسىندە قارسىلاس گارنيزونى وراسان شىعىنعا ۇشىراپ، ويسىراي جەڭىلىسكە ۇشىرادى. وسىلايشا، ءبىزدىڭ اسكەر نەمىس اسكەرىنىڭ جولىن كەستى.
كەڭەس ءبولىمى قورشاۋدا قالعان جاۋدى جان- جاقتان وقتىڭ استىنا الدى. نەمىستەر جان اياسپاي كۇرەسىپ باقتى. الايدا كەڭەس اسكەرىنىڭ قارقىنىنا قارسى تۇرا المادى. ءبىزدىڭ جاياۋ اسكەر مەن تانكيستەر ارتيللەريا كومەگىمەن جاۋدى ىدىراتىپ، ءتۇس اۋا نەمىس اسكەرىنىڭ كۇلىن كوككە ۇشىردى. ايقاس بارىسىندا ءىرى ونەركاسىپتىك فلوريدسدورف قالاسىن باسىپ الدى. ۇرىس الاڭىندا جاۋدىڭ مىڭداعان ساربازدارى مەن وفيتسەرلەرىنىڭ مۇردەلەرى عانا قالدى. 3- ۋكرايندىق مايدان اسكەرىنىڭ كومەگىمەن 2- ۋكرايندىق مايدان اسكەرى حاگەنبرۋنن، بيزامبەرگ، لانگەنتسەرسدورف، شتاممەرس- دورف، لەوپولداۋ، كاگران، شتادلاۋ قالالارىن باسىپ الدى.
ايقاستا 3 مىڭ نەمىس ساربازدارى مەن اسكەرى تۇتقىندالىپ، مىناداي زاتتار تاركىلەندى: ۇشاق - 32, تانكتەر مەن وزدىگىنەن جۇرەتىن قۇرىلعى - 49، قارۋ - 170، مينومت - 220, پۋلەمت - 215، اۆتوماشينا - 750، پاروۆوز - 175، - 4,5 مىڭ ۆاگون، 39 قويما.
3- ۋكرايندىق مايدان اسكەرى العا جىلجي وتىرىپ، ترايزەن وزەنىنە شىقتى. اسكەر نەمىستەردىڭ كوپتەگەن اسكەرىن وزەنگە تىقسىرىپ، كوزدەرىن جويدى. ودان ءارى جاۋدى تويتارا وتىرىپ، ترايزەن ارقىلى سانكت- پەلتەننىڭ سولتۇستىك جانە وڭتۇستىك قالالارىنا ءوتىپ نەمىستىڭ كۇشتى تىرەك پۋنكتىن يەلەندى. بۇدان باسقا پرەيۆيتس، ترايسمانەر، پوتتەنبرۋنن، راتتسەرسدورف، شتاتتەرسدورف، التمانسدورف ەلدى مەكەندەرىن باسىپ الدى.
15 - ساۋىردە ۆەنا وپەراتسياسى اياقتالدى. 3- شى جانە 2- ۋكرايندىق مايداننىڭ سول قاناتى بولگار اسكەرىمەن بىرلەسىپ نەمىستىڭ نەگىزگى كۇشى «وڭتۇستىك» توبىن جويىپ، ۆەنگريانى، چەحوسلاۆاكيانىڭ وڭتۇستىك اۋداندارىن، اۆستريانىڭ استاناسى ۆەنا مەن ونىڭ شىعىس بولىگىن تولىقتاي ازات ەتتى.
وپەراتسيا 31 تاۋلىككە سوزىلدى. مايدان ايقاسىنىڭ الاڭى - 230 شاقىرىم، كەڭەس اسكەرىنىڭ جىلجۋ تەرەڭدىگى - 150-250 شاقىرىم. شابۋىلدىڭ ورتاشا تاۋلىكتىك قارقىنى - 5-8 شاقىرىم، اسكەر سانى - 920500 ادام، شىعىن - 38661 (6,0 %) ، سانيتارلىق شىعىن - 129279, بارلىعى - 167940, ورتاشا تاۋلىكتىك - 5417 .
گيتلەر 1945- جىلى 15 - ساۋىردە اسكەرگە بۇيرىق جىبەردى:
«شىعىس مايدان ساربازدارى! سوڭعى جولى كەكتەنگەن بولشيەۆيزم جانقيارلىقپەن شابۋىل جاسادى. ولار گەرمانيانى تالقانداپ، حالقىمىزدىڭ ءتۇپ- تامىرىن جويماقشى.. . بولشيەۆيزمدى الدا بۇرىنعى تاعدىرى قارسى الادى، ولاردىڭ قانى سۋشا اعادى. وسى جولى كىم ءوز بورىشىن وتەمەسە، حالقىن ساتقانمەن تەڭ بولماق.. . بەرلين نەمىس حالقىنىكى، سولاي بولىپ قالا بەرەدى، ەۋروپا ەشقاشان ورىسقا اينالمايتىنى انىق.. . » .. .
