قاراماعىنداعى قىزمەتكەرىن ولتىرگەن پوليتسەي 24 جىلعا سوتتالدى

قىزىلوردا. قازاقپارات -  قىزىلوردا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى قاراماعىنداعى قىزمەتكەردى ولتىرگەن بۇرىنعى پوليتسيا قىزمەتكەرىنە قاتىستى ۇكىم شىعاردى، دەپ حابارلادى اتالعان سوتتىڭ باسپا ءسوز قىزمەتىنەن.

ءتورت ادامعا قاتىستى 26 تومدى قۇراعان قىلمىستىق ىستە: ادام ءولتىرۋ، الاياقتىق، قارۋدى زاڭسىز الىپ ءجۇرۋ، بوتەن ادامنىڭ مۇلكىن قاساقانا ءبۇلدىرۋ، قۇجاتتاردى، ءمورتاڭبالاردى، مورلەردى ۇرلاۋ، قىزمەتتەگى ارەكەتسىزدىك، قىلمىس تۋرالى حابارلاماۋ باپتارى بويىنشا ايىپ تاعىلدى.

قىزىلوردا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 24- قىركۇيەكتەگى ۇكىمىمەن سوتتالعان بەرىكبول توقتارباي ۇلى شيمانوۆ بىرنەشە باپ بويىنشا كىنالى دەپ تانىلىپ، مۇلكى تاركىلەنۋمەن، تۇپكىلىكتى 24 جىلعا باس بوستاندىعىنان ايىرىلدى. جازاسىن قاتاڭ رەجيمدەگى تۇزەۋ كولونياسىندا وتەۋ بەلگىلەندى.

سوتتالعان تالعات ومار ۇلى اليەۆ 18 جىلعا باس بوستاندىعىنان ايىرىلدى. جازاسىن قاتاڭ رەجيمدەگى تۇزەۋ كولونياسىندا وتەيتىن بولادى.

سونداي-اق، قىلمىستى حابارلاماعان، ءۋاليحان اسىلحان ۇلى سىزدىقوۆ پەن الدانبەك امانگەلدى ۇلى ورىنباسار كىنالى دەپ تانىلىپ، 1 جىلعا باس بوستاندىعىنان ايرىلدى.

ۋ. سىزدىقوۆقا قاتىستى قولدانىلعان «قاماۋعا الۋ» تۇرىندەگى بۇلتارتپاۋ شاراسىنىڭ كۇشى جويىلىپ، سوت زالىنان بوساتىلدى.

ۇكىم زاڭدى كۇشىنە ەنگەن جوق.

اۆتور: ەلۋباي اۋەزوۆ