ۋكراينادا تۇماۋ ەپيدەمياسىنان 246 ادام كوز جۇمدى
سوڭعى ءبىر تاۋلىكتىڭ وزىندە جۇقپالى اۋرۋدان 26 ادام كوز جۇمدى. ال ەپيدەميالىق ماۋسىم باستالعالى بەرى ىندەتتىڭ سالدارىنان 246 ناۋقاس قايتىس بولعان.
ونىڭ ۇشەۋى كامەلەتكە تولماعان بالالار. ءتىپتى، جۇقپالى كەسەل ءبۇتىن بىرنەشە وتباسىنىڭ ءومىرىن جالمادى دەگەن رەسمي اقپارات بار. مارقۇمداردىڭ دەنى دوڭىز تۇماۋىمەن اۋىرعان. ەلدىڭ دەنساۋلىق ساقتاۋ مينيسترلىگى وسى كۇنگە دەيىن اتى جامان ىندەتكە 3,5 ميلليون ازاماتتىڭ شالدىققانىن حابارلايدى.
ليۋبوۆ نەكراسوۆا، اۋرۋلاردى قاداعالاۋ جانە مونيتورينگ جۇرگىزۋ ورتالىعىنىڭ جەتەكشىسى:
- ءبىز 35 ناۋقاستىڭ ناقتى قانداي ۆيرۋستان قايتىس بولعانىن انىقتاي المادىق. بۇل H1N1 نەمەسە H3N2 ۆيرۋستارى ەمەس. A ۆيرۋسىنا ۇقسايدى. دەسە دە عىلىمي زەرتتەۋلەر جۇرگىزۋ قاجەت. ەندى ساراپتامالاردى لوندونداعى تۇماۋدى زەرتتەۋ ورتالىعىنا جىبەرەمىز. كەيىن بۇل ادامداردىڭ تۇماۋدىڭ قانداي تۇرىنەن قازا تاپقانىن ايتۋعا بولادى.
www.24.kz
