گيتلەردىڭ تەلەفونى 243 مىڭ دوللارعا ساتىلدى

استانا. قازاقپارات - ​كەشە امەريكانىڭ چەساپيك- سيتي قالاسىندا (مەريلەند شتاتى) وتكەن اۋكتسيوندا ادولف گيتلەردىڭ قىزىل تەلەفونى ساتىلدى.

ساتىپ الۋشى 243 مىڭ دوللار تولەگەن. بۇل سوماعا Alexander Historical Auctions اۋكتسيون ءۇيىنىڭ اقىسى دا قوسىلعان.

​ساراپشىلار لوت سيپاتتاماسىندا بۇل تەلەفوننىڭ «ەكىنشى دۇنيەجۇزىلىك سوعىستىڭ باستى سەبەپكەرى جازىقسىز مىڭداعان ادامنىڭ ءومىرىن قيۋعا وسى تەلەفونمەن بۇيرىق بەرگەنىن، اقىر اياعى ءوز ەلى مەن حالقىن قۇردىمعا جىبەرگەنىن» جازعان.

لوتتىڭ باستاپقى باعاسى 200-300 دوللاردى قۇراعان. ساتىپ العان ادامنىڭ اتى- ءجونى جاريالانعان جوق. بايلانىس قۇرالىن بريتاندىق ساياساتكەر ءارى اسكەري قىزمەتكەر رالف رەينەرلىڭ ۇرپاقتارى ساۋداعا شىعارعان.

فاشيستەردى تالقانداعاننان كەيىن رەينەر كەڭەس اسكەريلەرىمەن كەلىسىم جاساۋ ءۇشىن بەرلينگە كەلەدى. كسرو اسكەريلەرى وعان سىي رەتىندە گيتلەردىڭ جۇبايى ەۆا براۋننىڭ قارا تەلەفونىن سىيعا تارتپاق بولعان. الايدا رەينەر قىزىل ءتۇستى جاقسى كورەتىنىن ايتادى. سوڭىندا وعان گيتلەردىڭ قىزىل ءتۇستى تەلەفونىن سىيعا تارتىلادى.

اۋكسيوندى ۇيىمداستىرۋشىلار تەلەفون تاريحىنىڭ ءدال وسىلاي وربىگەنىن قۇجاتتارمەن، فوتوسۋرەتتەرمەن راستاپ وتىر. تەلەفونعا گيتلەردىڭ ەسىمى مەن نەمىس ۇلتتىق- سوتسياليستىك جۇمىس پارتياسىنىڭ سيمۆولى تاڭبالانعان.

دەرەككوز: http://www.newsru.com/