بەردىبەك ساپاربايەۆ جۇمىس ساپارىمەن ءبىر جىلدا 240 اۋىلعا بارعان
اتالعان جۇمىس ساپارلارى بارىسىندا ايماق باسشىسى جەرگىلىكتى تۇرعىندارمەن كەزدەسۋلەر وتكىزىپ، ولاردىڭ ۇسىنىستارى مەن وتىنىشتەرىنە قۇلاق اسىپ، جاۋاپتى تۇلعالار ءتيىستى تاپسىرمالار جۇكتەدى. بۇل تۋرالى جامبىل وبلىسىنىڭ اكىمى بەردىبەك ساپاربايەۆ حالىقپەن ەسەپ بەرۋ كەزدەسۋىندە ايتتى. سونداي-اق، ايماق باسشىسى ەل پرەزيدەنتىنىڭ تاپسىرماسىنا سايكەس حالىقپەن ءتيىمدى كەرى بايلانىس ورناتۋ بويىنشا جۇرگىزىلىپ جاتقان جۇمىستارعا باسا توقتالدى.
ماسەلەن، اعىمداعى جىلدىڭ 18-قاڭتارىنان باستاپ وبلىستاعى بارلىق دەڭگەيدەگى اكىمدەردىڭ 378 ەسەپ بەرۋ كەزدەسۋى وتكەن دەسەك، ولاردا جالپى 29,6 مىڭ تۇرعىن قامتىلعان. وبلىس اكىمى اۋىلدىق وكرۋگتەر مەن اۋدان اكىمدەرىنىڭ 14 ەسەبىنە قاتىستى. ەسەپ بەرۋ كەزدەسۋلەرىندە وزەكتى ماسەلەلەر تالقىلانىپ، تۇرعىندار اكىمدەردىڭ جۇمىسىن وبەكتيۆتى تۇردە باعالاۋعا مۇمكىندىك الدى. «تۇرعىنداردىڭ ءبىزدىڭ جۇمىسىمىزعا بەرەتىن باعاسى اسا ماڭىزدى. العا قويىلعان مىندەتتەردى ورىنداي الماعان اكىمدەر جاۋاپكەرشىلىككە تارتىلادى. ماسەلەن، بەكتوبە اۋىلىنىڭ تۇرعىندارى ەسەپ بەرۋ كەزدەسۋىندە قاراتوبە اۋىلدىق وكرۋگى اكىمىنىڭ جۇمىسىن سىنعا العان بولاتىن. ناتيجەسىندە ول قىزمەتىنەن بوساتىلدى»، - دەدى ب. ساپاربايەۆ.