گرەكيا ەلشىسىنىڭ زايىبى كۇيەۋىن ولتىرگەنى ءۇشىن 24,6 مىڭ دوللار بەرمەك بولعان
بۇل تۋرالى اقپاراتتى جۇما كۇنى باسپا ءسوز ءماسىليحاتىندا ءىستى جۇرگىزەتىن ريو- دە- جانەيرو پوليتسياسىنىڭ تەرگەۋشىسى ەۆاريستو پونتەس ماگاليايس ءمالىم ەتتى. ونىڭ ايتۋىنشا، ەدۋاردۋ مورەيرە دي مەللۋدىڭ كورسەتۋى نەگىزىندە وسىنداي ۇيعارىم جاسالىپ وتىر. ول ديپلوماتتىڭ ايەلىنىڭ كۇدىك كەلتىرىلگەن كوڭىلدەسى، ريو- دە- جانەيرو اسكەري پوليتسياسىنىڭ قىزمەتكەرى سەرجيۋ مورەيرو فيليۋدىڭ جاقىن ىنىلەرىنىڭ ءبىرى.
ەدۋاردتىڭ جاۋاپتارىنا قاراعاندا، «ءبارى دە الدىن الا تياناقتى تۇردە جوسپارلانعان» ، - دەدى تەرگەۋشى. فرانسۋازا اميريديس بولسا، ءوزىنىڭ كىناسىن مويىنداعان جوق. ەلشى زايىبىنىڭ ايتۋىنشا، كۇيەۋىنىڭ ءولىمى جايلى تەك كەلەسى كۇنى، وندا دا ديۆانعا جاعىلعان قاندى كورگەننەن سوڭ عانا بىلگەن. دەگەنمەن ايەل كوڭىلدەسىن ۇستاپ بەرمەگەن. كەرىسىنشە، ءوزىن كۇيەۋى بىرنەشە رەت سوققىعا جىققانىن مالىمدەگەن. ريو- دە- جانەيرو سوتى تەرگەۋشىلەردىڭ سۇرانىسىنا وراي ىسكە قاتىسى بار ۇشەۋىن دە تۇتقىنداۋعا وردەر بەردى. ولار تاعى 30 كۇن قاماۋدا بولادى. ازىرگە ەلشىنىڭ ءولىمىنىڭ سەبەبىن انىقتاۋ قيىنعا ءتۇسىپ وتىر. ويتكەنى ونىڭ ءمايىتى تۇگەلدەي جانىپ كەتكەن.
