قازاقستانعا 24-اقپاننان بەرى 108057 رەسەي ازاماتى كەلىپ، 99975 ى ەلدەن شىققان
قازاقپارات ساۋالىنا جولداعان جاۋابىندا ق ر ىشكى ىستەر مينيسترلىگىنىڭ باسپا ءسوز قىزمەتى وسىنداي مالىمەت ۇسىندى.
«بيىلعى 24-اقپاننان 2-ساۋىرگە دەيىن رەسەي فەدەراتسياسىنىڭ 108057 ازاماتى ەلگە كەلىپ، 99975 ى كەتتى. سونىمەن قاتار، 2022 -جىلدىڭ 3 ايىندا ر ف ازاماتتارى ءۇشىن - 10158 ج س ن گەنەراتسيالاندى»، - دەپ جازىلعان جاۋاپتا.
قۇزىرلى ورگاننىڭ اقپاراتىنا قاراعاندا، رەسەيلىكتەر قازاقستاننىڭ مەملەكەتتىك شەكاراسىن كەسىپ وتكەن ساتتەن باستاپ ۋاقىتشا تۇرۋعا رۇقسات الماي 90 تاۋلىككە دەيىن بولۋعا قۇقىلى.
«ىشكى ىستەر ورگاندارى رەسەي فەدەراتسياسىنىڭ اۋماعىندا ەڭبەك قىزمەتىن جۇزەگە اسىرعان جانە وتانىنا ورالعان قازاقستان رەسپۋبليكاسىنىڭ ازاماتتارىنىڭ ەسەبىن جۇرگىزبەيدى»، - دەپ جازادى ءى ءى م باسپا ءسوز قىزمەتى.
ەسكە سالساق، 11-ساۋىردەن باستاپ رەسەي، قىرعىز جانە وزبەكستانمەن شەكارادا بۇكىل شەكتەۋلەر الىنادى.
اۆتور: ەسىمجان ناقتىباي
