ەلوردالىق دارىگەرلەر 23 اپتادا تۋعان نارەستەنى امان الىپ قالدى

جەرگىلىكتى اكىمدىكتىڭ مالىمەتىنشە، ومىرگە كەلگەن كەزدە ءسابيدىڭ سالماعى - 600 گرم، بويىنىڭ ۇزىندىعى ءبىر پاراق قاعازبەن بىردەي - 32 سانتيمەتر بولعان.

قىزدىڭ اناسى بوسانعاننان كەيىن اۋرۋحانادا 124 كۇن جاتقانىن ايتتى. ونىڭ ىشىندە 88 كۇن - رەانيماتسيادا، قالعان كۇندەر جاڭا تۋعان نارەستەلەردى كۇتۋ بولىمىندە ءوتتى.

«قىزىما اياعىم اۋىر ەكەنىن بىلگەندە، ءبىز ءۇشىن بۇل ۇلكەن قۋانىش بولدى. جۇكتىلىك اسقىنۋسىز جاقسى ءوتتى. ءبىراق 23- اپتادا سۋ كەتىپ، مەرزىمىنەن بۇرىن بوسانۋعا تۋرا كەلدى. ءبىزدىڭ زەرەمىز 600 گرام سالماقپەن تۋدى. جاقسى مامانداردىڭ، تاجىريبەلى دارىگەرلەردىڭ ارقاسىندا قىزىم ءتىرى قالدى»، - دەپ ەسكە الادى ايەل.

4 ايدىڭ ىشىندە دارىگەرلەر مەن مەدبيكەلەر نارەستەگە ۇيرەنىپ قالدى، ونى جاقسى كورەدى. وسى ۋاقىت ارالىعىندا ءسابي ءوسىپ، سۇيەكتەرى قاتايىپ قالدى. پەرزەنتحانادان شىققان كەزدە ونىڭ سالماعى 2970 گرام بولدى.

«بالا وتە از دەنە سالماعىمەن تۋعاندىقتان، ونىڭ جاعدايى، تىنىس الۋى اۋىر بولدى. اناسىنىڭ ماحابباتىنىڭ، بىلىكتى مامانداردىڭ، نەانوتولوگتاردىڭ ەرەكشە قامقورلىعىنىڭ ارقاسىندا بالانىڭ دەنساۋلىعىنا قاۋىپ جوق»، - دەدى بالالار رەانيماتسياسى جانە قارقىندى تەراپيا ءبولىمىنىڭ مەڭگەرۋشىسى يرينا الەكساندروۆنا.

جىل سايىن 3№ كوپسالالى قالالىق اۋرۋحانادا سالماعى 1500 گرامعا جەتپەيتىن 80 گە جۋىق ءسابي دۇنيەگە كەلەدى. اعىمداعى جىلدىڭ توعىز ايىندا وسى سالماقتا 50 بالا پەرزەنتحانادان شىقتى.