شاردارادا قويشى قۇنى 23 ميلليون تەڭگەدەن اساتىن مالدى ساتىپ جىبەرگەن
تۇركىستان. قازاقپارات - تۇركىستان وبلىسى شاردارا اۋدانىندا قويشى وزىنە سەنىپ تاپسىرىلعان 400-دەن استام قويدى ساتىپ جىبەرگەن.
كۇدىكتىنىڭ قىلمىسى مال يەسىنىڭ قويلاردى تۇگەندەۋى بارىسىندا انىقتالعان، دەپ حابارلايدى قازاقپارات ءتىلشىسى.
وبلىستىق پ د باسپا ءسوز قىزمەتىنىڭ مالىمەتىنشە، ۇزىن اتا اۋىلىندا تۇراتىن مال يەسى پوليتسياعا ارىزدانعان. ول قويشىعا سەنىپ تاپسىرعان مالدارىنىڭ جوعالۋىنان وزىنە 23 ميلليون تەڭگەدەن استام شىعىن كەلگەنىن جەتكىزگەن.
وقيعا ورنىنا بارعان ءتارتىپ ساقشىلارى قويشىنىڭ ورداباسى اۋدانىنىڭ تۇرعىنى ەكەنىن انىقتايدى. بەلگىلى بولعانىنداي، سەزىكتى ەر ادام وتكەن جىلدىڭ تامىز ايىنان بەرى ۇساق مالدى بىرتىندەپ ساتىپ، ءوز پايداسىنا جاراتىپ كەلگەن. ال مۇنى جابىرلەنۋشى ارادا جىل وتكەن سوڭ بىلگەن. ول مالىن تۇگەندەگەندە 400-دەن اسا قويدىڭ جەتپەيتىنىن بايقاعان. قازىرگى تاڭدا كۇدىكتى ۋاقىتشا ۇستاۋ اباقتىسىنا قامالدى.
«كۇدىكتىگە قاتىستى سوتقا دەيىنگى تەرگەۋ امالدارى جۇرگىزىلە باستادى. اتالعان جايتتى پوليتسيا قىزمەتكەرلەرى ق ر ق ك-نىڭ 189-بابى «سەنىپ تاپسىرىلعان بوتەن مۇلىكتى يەمدەنىپ الۋ نەمەسە تالان-تاراجعا سالۋ» بويىنشا تىركەۋگە الدى»، - دەلىنگەن پوليتسيا حابارلاماسىندا.
