قىرعىزستان پرەزيدەنتى 23-تامىزدى ازا تۇتۋ كۇنى دەپ جاريالادى

بىشكەك. كابار- قازاقپارات - قىرعىزستان پرەزيدەنتى سادىر جاپاروۆ رەسەي فەدەراتسياسىنىڭ ۋليانوۆ وبلىسىندا جول- كولىك وقيعاسى سالدارىنان قىرعىز ازاماتتارىنىڭ قايتىس بولۋىنا بايلانىستى ۇندەۋ جاسادى، دەپ حابارلايدى قازاقپارات كابار اگەنتتىگىنە سىلتەمە جاساپ.

«قۇرمەتتى قىرعىزستاندىقتار! رەسەي فەدەراتسياسىنىڭ ۋليانوۆ وبلىسىندا بولعان وقيعا ءارقايسىمىز ءۇشىن قيىن جاعداي! ورنى تولماس وسى ءبىر قايعى بارلىعىمىزدىڭ جۇرەگىمىزگە اۋىر جارا سالدى.

ءبىز وتانداستارىمىزدىڭ جول- كولىك وقيعاسىنا تاپ بولعانى تۋرالى حاباردى زور كۇيزەلىسپەن قابىلدادىق.

قازا بولعانداردىڭ تۋىستارىنىڭ قايعىسىن تۇسىنەمىن جانە بولىسۋگە دايىنمىن، ولارعا قازىر وتە قيىن. مۇندايدا جۇباتاتىن ءسوز تابۋ قيىن. مەن اپاتتان قايتىس بولعاندار مەن زارداپ شەككەندەردىڭ تۋىستارى مەن جاقىندارىنا قايعىرىپ كوڭىل ايتامىن. اللا سىزدەرگە كۇش- قۋات، ءتوزىم بەرسىن!.

قاسيەتتى قۇراندا: «اللا سابىرلىلاردى جاقسى كورەدى»، - دەلىنگەن. سابىرلى بولىڭىزدار، قۇرمەتتى وتانداستار!

اپات سالدارىنان قازا تاپقاندار مەن زارداپ شەككەندەردىڭ تۋىستارى مەن جاقىندارىنا مىندەتتى تۇردە كومەك كورسەتىلەدى. بۇل ماسەلە مەنىڭ جەكە باقىلاۋىمدا بولادى.

قىمباتتى وتانداستار، بۇل قايعى - بۇكىل حالقىمىز ءۇشىن ۇلكەن قاسىرەت. وسىعان بايلانىستى 23-تامىزدى قىرعىز رەسپۋبليكاسىنىڭ اۋماعىندا جالپىعا ورتاق ازا تۇتۋ كۇنى دەپ جاريالايمىن»، - دەلىنگەن پرەزديەنتتىڭ ۇندەۋىندە.