قازاقپارات كۇنتىزبەسى: 23- جەلتوقسان

ەستە قالار وقيعالار

1994-جىلى بىشكەكتە قازاقستان رەسپۋبليكاسىنىڭ ەلشىلىگى رەسمي اشىلدى.

1994-جىلى الماتىداعى 12№ قازاق ورتا مەكتەبىنە شوقان ءۋاليحانوۆتىڭ ەسىمى بەرىلدى.

1995-جىلى قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ زاڭدىق كۇشى بار «جەكەشەلەندىرۋ تۋرالى» جارلىعى شىقتى.

2002-جىلى قازاقستان مەن قىتاي اراسىندا تاتۋ كورشىلىك قارىم-قاتىناس، دوستاستىق جانە سەرىكتەستىك تۋرالى كەلىسىمگە قول قويىلدى.

2005-جىلى قازاقستاننىڭ جەرۇستى عارىش ينفراقۇرىلىمىنىڭ ءبىرىنشى نىسانى - «اقكول» عارىشتىق بايلانىس ورتالىعى (ع ق و) پايدالانۋعا بەرىلدى. اۋماعى 8 گەكتاردان اساتىن «اقكول» و ك ق رەكوردتىق 9 ايدا سالىندى.

«اقكول» ۇ ق ك قۇرىلىمىنا عارىش اپپاراتتارىنىڭ ۇشۋىن باسقارۋ ورتالىعى (ع ب و)، كوماندالىق- ولشەۋ جۇيەلەرىنە ارنالعان راديواپپاراتۋرا، بايلانىس مونيتورينگى جۇيەسى (SMS)، بايلانىس جانە دەرەكتەردى بەرۋ جۇيەسى كىرەدى.

2008-جىلى «قازاقستان حالقىنىڭ رۋحاني دامىتۋ قورى» ا ق قۇرىلدى. ونىڭ نەگىزگى ماقساتى - قازاقستان حالقىنىڭ ءداستۇرى مەن مادەني قۇندىلىقتارىن دامىتۋدى قولداۋ جانە تۇراقتى باقىلاۋ.

2009-جىلى ەل پرەزيدەنتى نۇرسۇلتان نازاربايەۆ «ەگەمەن قازاقستان» گازەتىنىڭ باس كەڭسەسىنە بارىپ، گازەتتىڭ ۇجىمىن باسىلىمنىڭ 90 جىلدىعىمەن قۇتتىقتادى.

«ەگەمەن قازاقستان - رەسپۋبليكامىزدا قازاق تىلىندە شىعاتىن كونە گازەت. ءار جىلدارى ونى جۇسىپبەك ايماۋىتوۆ، بەيىمبەت مايلين، مۇحتار اۋەزوۆ، ساكەن سەيفۋللين، وراز جاندوسوۆ، عابيت مۇسىرەپوۆ، شەرحان مۇرتازا، ءابىش كەكىلبايەۆ سياقتى تانىمال تۇلعالار باسقارعان.

2010-جىلى جاپونيانىڭ فۋكۋوكا قالاسىندا قازاقستان رەسپۋبليكاسىنىڭ جاپونيانىڭ دامىعان ونەركاسىپ جانە عىلىمي-تەحنيكالىق ورتالىقتارىنىڭ ءبىرى - كيۋشيۋ ايماعىندا قۇرمەتتى كونسۋلدىعىنىڭ اشىلۋ سالتاناتى بولىپ ءوتتى.

2010-جىلى پەتروپاۆلدا گۋميناتارلىق كوللەدج عيماراتىنا الاش قوزعالىسىنىڭ قايراتكەرى، اقىن، قازاق ادەبيەتىنىڭ جارقىن جۇلدىزى ماعجان جۇمابايەۆقا ارنالعان ەسكەرتكىش تاقتا ورناتىلدى.

2013-جىلى قازاقستاندا «كىتاپ مادەنيەتىن دامىتۋعا قوسقان ۇلەسى ءۇشىن» اتتى جاڭا ناگرادا بەكىتىلدى.

مەدالدى قازاقستاننىڭ ۇلتتىق مەملەكەتتىك كىتاپ پالاتاسى، جازۋشىلار وداعى، كىتاپحانا، پوليگرافشىلار، باسپاگەرلەر جانە كىتاپ تاراتۋشىلار قاۋىمداستىعى تاعايىندادى. العاشقى ناگرادالار الماتى قالاسىندا تابىستالدى.

2014-جىلى ماسكەۋدە نۇرسۇلتان نازاربايەۆ پەن ۆلاديمير پۋتيننىڭ كەزدەسۋى بارىسىندا 2013-جىلعى 11- قاراشاداعى XXI عاسىرداعى تاتۋ كورشىلىك جانە وداقتاستىق تۋرالى ق ر مەن ر ف اراسىنداعى شارتتى راتيفيكاتسيالاۋ تۋرالى گراموتا الماسۋ تۋرالى حاتتاماعا قول قويىلدى.

2015-جىلى ق ر سىرتقى ىستەر مينيسترلىگى قازاق، ورىس جانە اعىلشىن تىلدەرىندە «قازاقستان - ۇلى دالا ەلى» مۋلتيمەديالىق قوسىمشاسىن شىعاردى. بۇل قوسىمشادا كوپتەگەن سۋرەتتەر، روليكتەر، بەينەسيۋجەتتەر، ءبىزدىڭ تاريحىمىز، مادەنيەتىمىز تۋرالى اقپاراتتار بار.

2016-جىلى قازاقستان رەسپۋبليكاسى مەن يران يسلام رەسپۋبليكاسى بىرلەسكەن توپتىق تۋريستىك ساپارلاردى جەڭىلدەتۋ بويىنشا كەلىسىمگە قول قويدى. بۇل قۇجات 5 تەن 50 ادامعا دەيىنگى تۋريستىك توپتار ءۇشىن ۆيزالىق رەجيمدى جەڭىلدەتەدى. ۆيزا توپتاعى ءبىر ادامعا بەرىلەدى. ەكى ەلدىڭ تۋريستىك بيلىگى قازاقستاننان يرانعا جول جۇرەتىن تۋريستىك توپتارىن قالىپتاستىرۋعا جاۋاپتى جەرگىلىكتى تۋروپەراتورلاردىڭ تىزىمىمەن بولىسەدى.

2020-جىلى جاپونياداعى ەڭ بەدەلدى جوعارى وقۋ ورىندارىنىڭ ءبىرى - تسۋكۋبا ۋنيۆەرسيتەتىندە ءابۋ ناسىر ءال-فارابي ورتالىعى اشىلدى. اتالعان ورتالىق گۋمانيتارلىق، الەۋمەتتىك جانە جاراتىلىستانۋ عىلىمدارى سالاسىنداعى بىرلەسكەن عىلىم-ءبىلىم جوبالارىن ىسكە اسىرۋ، كورنەكتى عالىم جانە فيلوسوف ءال-فارابيدىڭ التىن ەنتسيكلوپەديالىق مۇراسىن ىلگەرىلەتۋدىڭ بىرەگەي حالىقارالىق الاڭىنا اينالۋى ءتيىس.