موڭعوليا استاناسىندا 23- جەلتوقساننان باستاپ قاتاڭ كارانتين ەنگىزىلەدى
ۇلانباتىر. Montsame-قازاقپارات - موڭعوليا ۇكىمەتى ەل استاناسىندا 23- جەلتوقساننان باستاپ 2021-جىلدىڭ 6- قاڭتارىنا دەيىن جاپپاي قاتاڭ كارانتين جاريالادى، دەپ حابارلايدى قازاقپارات Montsame اگەنتتىگىنە سىلتەمە جاساپ.
موڭعوليا ۆيتسە-پرەمەرى يا. سودبااتاردىڭ ايتۋىنشا، مۇنداي شەشىم دەنساۋلىق ساقتاۋ مينيسترلىگى مەن ينفەكتسيالىق اۋرۋلاردى ۇلتتىق زەرتتەۋ ورتالىعى ماماندارىنىڭ، موڭعوليالىق عالىمدار مەن زەرتتەۋشىلەردىڭ ۇسىنىس-پىكىرىنە سۇيەنە وتىرىپ قابىلدانعان.
دەنساۋلىق جانە ينفەكتسيالىق اۋرۋلاردى ۇلتتىق زەرتتەۋ ورتالىعى جاۋاپتى ماماندارىنىڭ سوزىنە سەنسەك، موڭعول استاناسىندا ينفەكتسيانىڭ جاڭا كلاستەرى پايدا بولعان.
ول ۇلانباتىردىڭ بايانزۋرح اۋدانىندا تىركەلگەن.
ايتا كەتەيىك، موڭعوليادا 993 ادام كوروناۆيرۋس جۇقتىرعان. 509 پاتسيەنت ىندەتتەن جازىلىپ كەتتى. COVID-19 ۆيرۋسىنان قايتىس بولعاندار جوق.
موڭعوليا ۇكىمەتى ازاماتتاردى مۇمكىندىگىنشە قوعامدىق ورىندارعا بارماي، قاۋىپسىزدىك شارالارىن ساقتاۋعا جانە مەديتسينالىق ماسقا كيۋگە شاقىرادى.
