ەلوردادا ەكى كۇندە ماس كۇيدە كولىك جۇرگىزگەن 23 جۇرگىزۋشى ۇستالدى
نۇر-سۇلتان. قازاقپارات - نۇر-سۇلتان قالاسىنىڭ ءتارتىپ ساقشىلارى ەكى كۇننىڭ ىشىندە ماس كۇيدە كولىك جۇرگىزگەن 23 جۇرگىزۋشىنى ۇستادى، دەپ حابارلايدى قازاقپارات ءتىلشىسى قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
وتكەن اپتادا سەنبى كۇنى تۇندە جۇمابايەۆ كوشەسىندە ءتارتىپ ساقشىلارى «BMW» ماركالى اۆتوكولىكتى توقتاتقان. اتالعان كولىكتىڭ جۇرگىزۋشىسىن قۇجاتتارىن تەكسەرۋ كەزىندە 25 جاستاعى جىگىتتەن ىشىمدىكتىڭ ءيىسى سەزىلگەن. كولىك جۇرگىزۋدەن ونى شەكتەگەن جول پوليتسەيلەرى جاس جىگىتتى مەديتسينالىق كۋالاندىرۋدان وتكىزۋدى ۇسىنعان.
دارىگەر-ناركولوگ ونىڭ جەڭىل دارەجەدە ماس بولعانىن انىقتاعان. ۇستالعان ازاماتتىڭ ۇستىنەن اكىمشىلىك كودەكستىڭ 608-بابى 1-بولىگى بويىنشا قىلمىتسىق ءىس قوزعالىپ، ونىڭ كولىگى ايىپ تۇراعىنا جەتكىزىلدى. اكىمشىلىك سوتتىڭ شەشىمىمەن ماس كۇيدە كولىك تىزگىنىنە وتىرعان جاس جىگىت 15 تاۋلىككە قامالىپ، 7 جىل بويى كولىك جۇرگىزۋ قۇقىعىنان ايىرىلدى.
«جول اپاتتارىنىڭ الدىن الۋ ءۇشىن ەلوردالىق پوليتسەيلەر جول ەرەجەلەرىن بۇزۋ فاكتىلەرىنە باسا نازار اۋدارۋدا. وسى ماقساتتا دەپارتامەنت «ماس جۇرگىزۋشى - قىلمىسكەر» جەدەل الدىن الۋ شارالارىن تۇراقتى تۇردە وتكىزەدى»، - دەپ حابارلايدى دەپارتامەنتتەن.
پوليتسيا قىزمەتكەرلەرى كولىكتى ماس كۇيدە جۇرگىزگەن ازاماتتاردى كورگەن ادامدارعا 102 نەمەسە 716525 نومىرىنە حابارلاسۋدى سۇرايدى.
