قازاقپارات كۇنتىزبەسى: 23- ءساۋىر

اتاۋلى كۇندەر

بۇكىل دۇنيەجۇزىلىك كىتاپ جانە اۆتور قۇقىعىن قورعاۋ كۇنى

بۇل مەرەكەنى 1996-جىلى UNESCO ۋيليام شەكسپير (1564-1616)، ميگەل دە سەرۆانتەس (1547-1616) جانە جازۋشى - تاريحشى ينكو گارسيلاسودە لا ۆەگانى (1539-1616) ەسكە الۋ ماقساتىندا بەكىتتى.

بۇل ءۇش جازۋشى دا 1616-جىلعى ءساۋىردىڭ 23-ىندە ومىردەن وتكەن. قازىر بارلىق وركەنيەتتى ەلدەردە كىتاپ جارمەڭكەلەرى، كورمەلەر مەن فەستيۆالدار وتكىزىلەدى.

تۇركيا رەسپۋبليكاسىنىڭ ۇلتتىق ەگەمەندىك جانە بالالار كۇنى

1919-جىلى مۇستافا كەمال اتاتۇرىك باستاعان تۇرىك حالقى تۇركيانىڭ تاۋەلسىزدىگى ءۇشىن سوعىستى باستادى. 1920-جىلى 23- ساۋىردە انكارادا تۇركيانىڭ پارلامەنتى - ۇلى ۇلتتىق ءماجىلىسى قۇرىلدى. قازاقستان رەسپۋبليكاسى مەن تۇركيا اراسىنداعى ديپلوماتيالىق قارىم-قاتىناس 1992-جىلعى ناۋرىزدىڭ 2 دە ورناتىلدى.

حالىقارالىق «اقپاراتتىق-كوممۋنيكاتسيالىق تەحنولوگيا قىزدارى» كۇنى

حالىقارالىق ەلەكتر بايلانىس وداعىنىڭ باستاماسىمەن ءساۋىردىڭ ءار ءتورتىنشى بەيسەنبىسىندە اتاپ وتىلەدى. حالىقارالىق «اكت قىزدارى» كۇنى اقپاراتتىق-كوممۋنيكاتسيالىق تەحنولوگيالار (ا ك ت) سالاسىنداعى ايەلدەردىڭ ماڭىزىن كورسەتىپ، وسى دامىپ كەلە جاتقان سالاعا ولاردىڭ قىزىعۋشىلىعىن وياتۋ ءۇشىن اتاپ وتىلەدى. جىل سايىن الەمنىڭ تۇكپىر-تۇكپىرىندەگى قىزدار مەن جاس ايەلدەر تەحنولوگيالارمەن جۇمىسىن كورسەتىپ، دامىتۋ ءۇشىن جۇزدەگەن شاراعا قاتىسادى.

ەستە قالار وقيعالار

1957-جىلى قوستاناي وبلىسىنداعى رۋدنىي ەلدى مەكەنى قالا مارتەبەسىن الدى.

2004-جىلى استانا قالاسىندا قازاقستان رەسپۋبليكاسىنىڭ ۇلتتىق اكادەميالىق كىتاپحاناسى قۇرىلدى. ونىڭ باس ديرەكتورى بولىپ پروفەسسور، تاريح عىلىمدارىنىڭ كانديداتى روزا امانعالي قىزى بەردىعاليەۆا تاعايىندالدى.

2009-جىلى مەملەكەت باسشىسى نۇرسۇلتان نازاربايەۆ «قازاقستان رەسپۋبليكاسىنداعى مەرەكەلەر تۋرالى» قازاقستان رەسپۋبليكاسىنىڭ زاڭىنا وزگەرىستەر ەنگىزۋ تۋرالى» زاڭعا قول قويدى. زاڭ ناۋرىز مەيرامىن مەرەكەلەۋ كۇندەرىن ناۋرىزدىڭ 21 نەن 23 نە دەيىن ۇلعايتۋدى جانە قازاقستان رەسپۋبليكاسى كۇنىن مەرەكەلەۋدى الىپ تاستاۋدى كوزدەيدى.

2010-جىلى قازاقستان رەسپۋبليكاسىنىڭ ۇلتتىق كىتاپحاناسىندا «تەلەليفت» جۇيەسى ورناتىلدى. بۇل ورتالىق ازياداعى العاشقى وسىنداي كىتاپحانا. سونىڭ ارقاسىندا قوردا ساقتاۋلى تۇرعان كىتاپتار بىرنەشە مينۋتتىڭ ىشىندە وقۋ زالىنا جەتكىزىلەدى.

2010-جىلى قازاقستان پرەزيدەنتى نۇرسۇلتان نازاربايەۆقا كورەيا ۋنيۆەرسيتەتىنىڭ قۇرمەتتى عىلىم دوكتورى اتاعى بەرىلدى.

2017-جىلى بريۋسسەلدە وتكەن جاس پيانينوشىلاردىڭ Merci، Maestro! حالىقارالىق بايقاۋىندا قازاق ۇلتتىق ونەر ۋنيۆەرسيتەتىنىڭ تاربيەلەنۋشىسى ءبيالي بيكەنوۆ «ەڭ جاس ورىنداۋشى» ساناتىندا لاۋرەات اتاندى.

2018-جىلى بەيجىڭدە «بالدىرعان» بالالاردى دامىتۋ ورتالىعىنىڭ رەسمي اشىلۋ ءراسىمى ءوتتى. بۇل شەتەلدەگى قازاق تىلىندە ءبىلىم بەرەتىن العاشقى جەكە ورتالىق.

2019-جىلى قازاقستان رەسپۋبليكاسى كونستيتۋتسيالىق كەڭەسى قازاقستان رەسپۋبليكاسى پرەزيدەنتى قاسىم-جومارت توقايەۆقا ق ر كونستيتۋتسياسىنىڭ 41-باپ 2-تارماعىن رەسمي تالداۋدى ۇسىنىپ ءوتىنىش جولدادى. جولداۋدا مەملەكەت باسشىسى لاۋازىمى ۇمىتكەرلەرىنە قويىلاتىن سوڭعى ون بەس جىلدا قازاقستاندا تۇرۋ تۋرالى تالاپتىڭ مازمۇنىن ءتۇسىندىرۋ ماسەلەسى قويىلدى، سونداي-اق ازاماتتىڭ رەسپۋبليكانىڭ شەت ەلدەردەگى مەكەمەلەرىندە جانە قازاقستان مۇشەلىك ەتەتىن حالىقارالىق ۇيىمداردا جۇمىس ىستەگەن كەزدە تۇرعان ۋاقىتى ەسەپتەلە مە دەگەن ساۋال جولداندى.

2019 -جىلى جەڭىل اتلەتيكادان دوحادا ءوتىپ جاتقان ازيا چەمپيوناتىندا 400 مەترگە جۇگىرۋدەن ەرلەر اراسىنداعى باسەكە اياقتالدى. ەكى كۇن ىشىندە قازاقستاندىق جەلاياق ەلىمىزدىڭ ەكى رەكوردىن ورناتتى.

كەشە وتكەن جارتىلاي فينالدىق جارىستا ول اتالعان قاشىقتىقتى 45,38 ۋاقىت كورسەتكىشىندە جۇگىرىپ وتكەن.

بۇگىن ليتۆين 400 مەتردى 45,25 سەكۋندتا باعىندىردى. بۇل قازاقستاننىڭ جاڭا رەكوردى. بۇدان باسقا، 100 مەترگە جارىسۋدان ايەلدەر اراسىنداعى باسەكەدە قازاقستاندىق ولگا سافرونوۆا ازيا چەمپيونى اتاندى. ول اتالعان قاشىقتىقتى 11:17 سەكۋندتا جۇگىرىپ ءوتىپ، قۇرلىق دوداسىنىڭ جاڭا رەكوردىن ورناتتى.