سينوپتيكتەر 23- قازان كۇنگى اۋا رايىن ايتتى

استانا. قازاقپارات - 23- قازان كۇنى قازاقستاننىڭ باسىم بولىگىندە جاۋىن-شاشىنسىز اۋا رايى بولجانادى.

رەسپۋبليكانىڭ تەك سولتۇستىك-شىعىس، شىعىس جارتىسىندا تسيكلوننىڭ وتۋىنە بايلانىستى قۇبىلمالى كۇن رايى ساقتالادى، كەي جەرلەردە جاۋىن-شاشىن كۇتىلەدى. ال جەكەلەگەن اۋماقتاردا جەل كۇشەيىپ، تۇمان، كوكتايعاق بولادى، دەپ حابارلايدى قازاقپارات.

اتاپ ايتقاندا، سولتۇستىك قازاقستان وبلىسىنىڭ كەي جەرلەرىندە تۇمان، 15-20 م/س ەكپىندەگى جەل بولجانادى. جەكەلەگەن اۋماقتاردا ونىڭ ەكپىنى 23-28 م/س كۇشەيەدى.

شىعىس قازاقستان وبلىسىنىڭ كەي جەرلەرىندە تۇمان، كوكتايعاق كۇتىلەدى، جەل 15-20 م/س كۇشەيەدى.

جامبىل، تۇركىستان، ماڭعىستاۋ وبلىستارىنىڭ كەي جەرلەرىندە كۇندىز جەلدىڭ جىلدامدىعى 15-20 م/س ارتادى.

قاراعاندى، اقمولا، تۇندە جانە تاڭەرتەڭ قوستاناي وبلىسىنىڭ كەي جەرلەرىندە تۇمان بولۋى ىقتيمال.