قازاقستاننىڭ 23 ازاماتى كورەيا اۋەجايىنىڭ جەرتولەسىندە جاتىر
قازىر وتانداستارىمىز اۋەجايدىڭ جەرتولەسىندە وقشاۋ جەردە وتىر، دەپ حابارلايدى قازاقپارات «حابار 24» تەلەارناسىنا سىلتەمە جاساپ.
«بىزگە مىنا بەينەجازبانى ۇستالعانداردىڭ ءبىرى، قازاقستان ازاماتى شۋحرات ءتاجىمۇراتوۆ جىبەردى. ايتۋىنشا، ول كورەياعا كەشە تۇنگى 00:50-دە Air Astana اۋە كومپانياسىنىڭ ۇشاعىمەن كەلگەن. ماقساتى - ساياحاتتاۋ، ءبىراق كورەيانىڭ كوشى- قون پوليتسەيلەرى شۋحراتقا سەنىمسىزدىك بىلدىرگەن»، - دەيدى سەۋلدەن ماسەلەنىڭ ءمان- جايىن بايانداعان تەلەارنانىڭ مەنشىكتى ءتىلشىسى ۆلاديسلاۆ سوي.
«ءبىز سەۋلگە تاڭەرتەڭ جەتتىك، اۋەجايدا ءبىزدى قالاعا كىرگىزبەي، ءبىر رەيستەن 18 ادامدى ۇستاپ قالدى. «ءسىزدى قالاعا جىبەرۋگە سەبەپ- نەگىز جوق» دەيدى. ولاردىڭ سىلتاۋى - نە اقشاڭ از، ال اقشاسى بارلارعا «ءتىل بىلمەيسىڭ» دەيدى. ءبىزدى قازىر جەرتولەدە ۇستاپ وتىر. بارلىعى 18 ادامبىز. 18 ادامنىڭ بارلىعىنىڭ قۇجاتتارى دۇرىس بولماۋى مۇمكىن ەمەس»، - دەدى تەلەفون ارقىلى ساياحاتشى شۋحرات ءتاجىمۇراتوۆ.
قازاقستاننىڭ كورەياداعى جالعىز كونسۋلى دەمالىسسىز جۇمىس ىستەۋگە ءماجبۇر. ويتكەنى سوڭعى كەزدە زاڭسىز ميگرانتتار كوبەيىپ كەتكەن. ونىڭ ۇستىنە استانا مەن الماتىدان كەلەتىن رەيستەردەن قازاقستاننىڭ شامامەن بەس- التى ازاماتىنا وڭتۇستىك كورەيا اۋماعىنا وتۋىنە رۇقسات بەرىلمەيدى.
«بارلىعى تۋريسپىز دەپ كەلەدى. ءبىراق ولاردى سەۋلدە ەشكىم كۇتىپ المايدى. كورەيا ەلىن ارالاتاتىن مەكەمەلەر بەكىتىلمەگەن. سوندىقتان «كەلگەن ماقساتتارىنا ساي ەمەس» دەگەن جەلەۋمەن ەلدەرىنە قايتارىلىپ جاتىر. ونىڭ ۇستىنە، ولاردا تۋريزم ءۇشىن اقشالارى جەتكىلىكسىز بولادى، كورەيا وتە قىمبات ەل، 2-3 مىڭ دوللار بۇل جەردە ءبىر- ەكى كۇنگە عانا جەتەدى»، - دەپ اتاپ ءوتتى كونسۋلدىق ماسەلەلەر جونىندەگى ق ر- دىڭ كورەيا رەسپۋبليكاسىنداعى ەلشىلىگىنىڭ كەڭەسشىسى عابيدەن تەمىربەكوۆ.
تەلەفون ارقىلى شۋحرات ءتاجىمۇراتوۆتىڭ ايتۋىنشا، بۇگىن ۇستالعان قازاقستاندىق 18 ازاماتتىڭ قاتارىنا تاعى 5 وتانداسىمىز قوسىلعان. «ەرتەڭ، 19-ى كۇنى ساعات 13:00-دە قايتا ۇشىرىپ جىبەرەمىز دەپ جاتىر. بىزدە جەرتولەدە ەشقانداي جاعداي جوق. ەدەندە جاتامىز. تاماقتارى ايتارلىقتاي ەمەس»، - دەدى ول.
كونسۋل عابيدەن تەمىربەكوۆ كورەياعا تۋريزم ماقساتىندا ساياحاتتاپ كەلەمىن دەۋشىلەر اتالمىش ەلدىڭ تۋريستىك كومپانيالارىنا الدىن الا حابارلاسۋ قاجەتتىگىن ايتادى.
«قازىر تەحنولوگيالار جاقسى دامىعان عوي، ينتەرنەت ارقىلى، تەلەفون ارقىلى حابارلاسىپ، تۋريستىك ۆاۋچەر ساتىپ الۋ كەرەك. سونداي- اق ول كومپانيادان ينچحون اۋەجايىنا وسىنداي ادامنىڭ كەلە جاتقاندىعى، ولاردى كۇتىپ الىپ، شىعارىپ سالاتىندىعى تۋرالى جازىلعان كەپىلدىك حات جىبەرۋدى ءوتىنۋ قاجەت. سوندا ولاردى ەشقانداي كەدەرگىسىز وتكىزەدى»، - دەپ اتاپ ءوتتى ع. تەمىربەكوۆ.
قازاقستان ەلشىلىگى بەرگەن مالىمەت بويىنشا، بيىل وڭتۇستىك كورەياعا 1890 ادام زاڭسىز كەلگەن. ولاردىڭ دەنى تۋريسپىز دەگەنىمەن، شىن مانىندە جۇمىس ىستەپ، تابىس تابۋدى كوزدەيتىن كورىنەدى.
