اباي قۇنانبايەۆتىڭ باكىسى 23 مىڭ دوللارعا ساۋدالانىپ جاتىر
يسلام جۇماتايەۆتىڭ ايتۋىنشا، ۇلى اقىن كەزىندە بۇل پىشاقتى ونىڭ اتاسىنا سىيلاعان ەكەن. ءبىراق مۇنى اۋىزشا ايتقانىمەن، قاريانىڭ قولىندا ناقتى دالەل جوق دەپ حابارلايدى ك ت ك ارناسى.
جەرگىلىكتى مۇراجاي ماماندارى قانشاما دەرەككوزدەرىن اقتارىپ كورگەنىمەن، وعان قاتىستى مالىمەت تابا الماعان.
1890-جىلدارى اباي ەلىن قاتتى جۇت جايلاپتى. سول كەزدە ءۇيىر جىلقىنى امان الىپ قالۋ ءۇشىن مەيرامعالي دەگەن بايدىڭ قىستاۋىندا ءبىر جىل وتىرعان ەكەن. باكى سول بايدىڭ بالاسىنا سىيعا تارتىلعان كورىنەدى. ەندى اقساقال اۋلەتتە ءبىر عاسىردان اسا ۋاقىت بويى ساقتالىپ كەلگەن قۇندى زاتتى ساتۋعا بەكىنىپ وتىر.
«تەككە بەرمەيمىن. 23 مىڭ دوللار اقشا. ماعان سول ۇيىمە جەتپەگەن اقشاعا جىگىتتەر كومەكتەسسە، سول ادامعا بەرەمىن. سونشاما جىل ساقتاپ كەلىپ، ەشكىمگە تەگىن بەرمەيمىن»، - دەيدى سەمەي قالاسىنىڭ تۇرعىنى يسلام جۇماتايەۆ.
باكى جەزبەن كومكەرىلىپ، مۇسىلمانشا بەزەندىرىلگەن. ءجۇزى ءالى ءبىر رەت تە قايرالماپتى. ال جەرگىلىكتى مۇراجاي ماماندارى كەزىندە اباي ەلىن جۇت جايلاپ كوشكەنىن راستاعانىمەن، باكىنى سىيعا تارتقانى جونىندە ەشقانداي دەرەك تاپپاعان.
«ءبىزدىڭ مۇراجاي قورىندا ساقتالعان ەستەلىكتەر مەن ۇرپاقتارىنىڭ جازبالارىنىڭ ەشقايسىندا وسىنداي زاتتى اباي بىرەۋگە سىيعا تارتتى دەگەن دەرەك جوق. مۇمكىن، ءالى ىزدەۋ كەرەك شىعار. سوندا مالىمەتتىڭ تابىلىپ قالۋى دا عاجاپ ەمەس. ءبىراق بۇگىنگى كۇنگە دالەلدەمە نەگىزى وتە از بولىپ تۇر»، - دەيدى اباي قورىق-مۇراجايى ديرەكتورىنىڭ ورىنباسارى مەيرامگۇل قايرامبايەۆا.
اقساقالدان باكىنى ساتىپ الماق تۇگىلى مۇراجايعا تەگىن وتكىزەمىن دەسە دە، ماماندار قابىلدامايمىز دەپ وتىر. سەبەبى، ول ارنايى تەكسەرىستەن وتپەگەن جانە باكىگە قاتىستى ەشقانداي ناقتى دالەل جوق. ال ونى تەكسەرىستەن وتكىزۋ قوماقتى قاراجاتتى تالاپ ەتەدى. ونداي اقشا اقساقالدىڭ دا جانە مۇراجاي قىزىمەتكەرلەرىنىڭ قولىندا جوق.
اقساقال باكىنى 2009-جىلى الماتىداعى ءابىلحان قاستەيەۆ مۇراجايى مەن مادەنيەت مينيسترلىگىنە دە اپارىپ كورسەتكەن. ولار تەك بۇل زاتتى شەت جاققا اسىرماۋدى ءوتىنىپتى. ەندى تاريحي زاتتى ەلىمىزدە ساتىپ الۋشى تابىلماعان جاعدايدا يسلام جۇماتايەۆ، ونى ينتەرنەت ارقىلى اۋكتسيونعا شىعارماق نيەتتە.
