ۇ ب ت-دان 23 مىڭنان اسا بالانىڭ تومەن بالل الۋىنىڭ سىرى نەدە؟
- بۇل جەردە ناقتى بىرەۋدى كىنالاۋعا بولمايدى. مەنىڭ ويىمشا، بيىل ۇلتتىق ءبىرىڭعاي تەستىلەۋ ءادىل ءوتتى.
وسى جىلى تەست جاۋاپتارىن كوشىرۋگە رۇقسات بەرىلگەن جوق، بالالاردان قانشاما ۇيالى تەلەفوندار، شپارگالكالار الىنىپ جاتتى. وقۋشىلار اراسىندا وقۋعا ءمان بەرمەي، كوشىرە سالامىز دەگەن ويمەن تومەن بالل الىپ قالعاندارى بولۋى مۇمكىن.
نەگىزىندە مۇعالىمدەر ساباقتى جاقسى بەرەتىنىنە كۇمانىم جوق. مىسالى ۇ ب ت-دا قازاق تىلىنەن 25 سۇراق بولسا، سونىڭ 4 سۇراعى فونەتيكا، 3 سۇراعى لەكسيكا، 2 سۇراعى ءسوزجاسام، 8 سۇراعى مورفولوگيا، 7 سۇراعى سينتاكسيس بويىنشا بولادى عوي. ال فونەتيكا، لەكسيكانى بالا 5-سىنىپتا، مورفولوگيانى 6-7-سىنىپتا، سينتاكسيستى 8- 9-سىنىپتا ءوتىپ كەتكەن.
ال 10-11-سىنىپتا شەشەندىك پەن ءسوز مادەنيەتىن مەڭگەرەدى، ول جەردە تەوريانى وقىمايدى. سوندىقتان ەكى جىلدا بالا تەوريانىڭ ءبارىن ۇمىتىپ قالىپ جاتادى، ال ۇ ب ت-عا كەلگەندە سول تەوريالاردى سۇرايدى. دەگەنمەن دە بەسىنشى سىنىپتان باستاپ فۋندامەنت قالانباسا، بالا ءبىر جىلدىڭ ىشىندە ءبارىن قايتالاپ ۇلگەرمەۋى مۇمكىن. سوندىقتان ۇ ب ت-عا دايىندالاتىن جاقسى جوسپار جاساۋ كەرەك سياقتى.
اننا قۇدياروۆا، پسيحولوگ:
- مۇمكىن سول بالالاردىڭ ءبىلىمى تومەن بولعان شىعار. مۇعالىمدەردىڭ ءبارىن بىردەي كىنالاۋ قيىن. التىن باستى مۇعالىم ءبىلىم بەرسە، ءبىراق ونى جەتە تۇسىنبەيتىن وقۋشى بولسا، ونى قانشا وقىتقانىڭمەن ءبىلىمدى قابىلدامايدى.
23 مىڭ بالانىڭ 23 مىڭ سەبەبى بولۋى مۇمكىن. ۇ ب ت قالاي ايتقاندا دا سىناق، ەمتيحان. بالانىڭ بويىنداعى ىشكى ۇرەي، ىشكى قورقىنىش ءدال سول ءۇش ساعاتتىڭ ىشىندە ودان سايىن ەسەلەي تۇسەدى. ءبىلىپ تۇرعان نارسەسىن ىشكى ۇرەيدىڭ اسەرىنەن ۇمىتىپ نەمەسە مۇعالىمدەردەن، تاعى ءبىر باسقا وكىلدەردەن قورىققانىنان جازا الماي قالادى.
مۇنى ەكى سەبەپكە بولۋگە بولادى: ءبىر جاعىنان پسيحولوگيالىق دايىندىقسىزدىق، ەكىنشى جاعىنان پەداگوگيكالىق دايىندىقسىزدىق. سوندىقتان بالانى 11-سىنىپتا ەمەس، 8-9-سىنىپتان باستاپ دايىنداۋ كەرەك دەپ ويلايمىن.
الماس سادۋاقاسوۆ، قوستاناي قالاسىنداعى ى. التىنسارين اتىنداعى دارىندى بالالارعا ارنالعان مەكتەپ ينتەرنات ديرەكتورىنىڭ ورىنباسارى:
- جيىرما مىڭنان استام بالانىڭ تومەن بالل جيناۋى، وقۋشىلاردىڭ دايىندىقتارىنىڭ تومەندىگىنەن دەۋگە بولادى. قازىرگى كەزدە بالالاردىڭ كوبى دايىن نارسەگە ۇيرەنىپ قالعان. ويتكەنى ولاردىڭ تەستكە دايىندالۋعا ۋاقىتتارى بولدى، ەشكىم ولاردىڭ قولىن قاققان جوق. نەگىزى، بۇل بالالاردىڭ، اتا-انانىڭ، مۇعالىمنىڭ قاتىسۋىمەن ورىن الاتىن ءۇش جاقتى پروتسەسس قوي. مىسالى، مۇعالىم ءبىر بالاعا ءبىلىمدى جاقسى بەرىپ، ەكىنشىسىنە دۇرىس بەرمەدى دەپ ويلامايمىن.
ءار بالانىڭ قابىلداۋى ءارتۇرلى. اتا-انالار تاراپىنان كەيدە تۇسىنبەۋشىلىكتەر بولىپ جاتاتىن كەزدەر دە جوق ەمەس، ونداي كوپ شۋ شىعارعانشا بالالارىنا پسيحولوگيالىق كومەك بەرۋى ءتيىس. قازىر كوپشىلىگى تاۋەلدى بولىپ بارا جاتقان «WhatsApp» مەسسەندجەرى، «Mail.ru»، «ۆكونتاكتە» سياقتى الەۋمەتتىك جەلىلەردى قويىپ، سىناققا دايىندالسا، ءبىلىمىن اقتاۋعا بولادى دەپ ويلايمىن.
ساۋالنامانى جۇرگىزگەن - نۇرسۇلۋ مىرزاحمەتوۆا
«ايقىن»
