بورتىندا 239 ادامى بولعان ۇشاقتىڭ جوعالعانىنا 2 جىل

استانا. قازاقپارات -  «تابىلعان ۇشاق سىنىقتارى  Boеing-777 ۇشاعىنا تيەسىلى ەمەس. مۇنىڭ ءبارى جالعان.» وسىدان تۋرا ەكى جىل بۇرىن اۋە لاينەرىمەن بىرگە جوعالىپ كەتكەن 239 ادامنىڭ تۋىستارى وسىلاي دەپ وتىر. ولار ارادا قانشا ۋاقىت وتسە دە، جاقىندارىنىڭ ءالى ءتىرى ەكەنىنە سەنىمدى.

 الايدا، وكىنىشكە قاراي، سوڭعى كۇندەرى ۇشاق سىنىقتارى بىرنەشە مارتە تابىلدى. ءبىراق ونىڭ ءدال وسى مالايزيالىق اۋە كولىگىنىكى ەكەنى رەسمي راستالعان جوق.

مالايزيا پارلامەنتىنىڭ جۇمىسى ەكى جىل بۇرىن جوعالىپ كەتكەن ۇشاق جولاۋشىلارىن 1 مينۋت ۇنسىزدىكپەن ەسكە الۋمەن باستالدى. تەرگەۋشىلەر لاينەردىڭ ءۇندى مۇحيتىنا قۇلاپ، جولاۋشىلاردىڭ بارلىعى قازا تاپقانىنا سەنىمدى. ءبىراق ەكى اپتا بۇرىن جاڭا اقپارات پايدا بولدى. موزامبيك جاعالاۋىندا ۇزىندىعى ءبىر مەتردەي ۇشاق قالدىعى تابىلدى. ازىرگە ونىڭ ءدال وسى Boеing-777-گە تيەسىلى ەكەنى ءسوز جۇزىندە عانا ايتىلۋدا. وعان قوسا بىرەر كۇن بۇرىن فرانسيانىڭ رەيۋنون ارالىندا جوعالعان ۇشاققا تيەسىلى بولۋى مۇمكىن تاعى ءبىر زات تابىلدى. دەگەنمەن ونىڭ مالايزيالىق اۋە كەمەسىنىڭ بولشەگى مە، جوق پا، ونى ساراپتاما قورىتىندىسى انىقتاماق.

 ليوۋ تيونگ لاي، مالايزيا كولىك ءمينيسترى:

 - موزامبيك جاعالاۋىنان تابىلعان قالدىقتارعا كەلەر بولساق، ءبىزدىڭ زەرتتەۋ توبىمىز سول ماڭايدا جۇمىس جۇرگىزىپ جاتىر. قورىتىندىنى شىعارۋدى تەزدەتۋ ءۇشىن ەل بيلىگى اۆستراليامەن تىعىز بايلانىس ورناتقان. ال رەيۋنون ارالىنان تابىلعان بولىك ءبىز جوعالتقان ۇشاققا تيەسىلى دەپ ويلايمىز.

 قىتايدا جوعالعان ۇشاقتا بولعان جولاۋشىلاردىڭ تۋىستارى شەرۋگە شىقتى. 40 شاقتى ادام بەيجىڭدەگى بۋددا شىركەۋىنە جينالىپ، مالايزيا اۋە كومپانياسىنان تەرگەۋ امالدارىن قايتا باستاۋدى تالاپ ەتكەن.

داي شۋكين، ۇشاقتا بولعان جولاۋشىنىڭ تۋىسى:

 - ءبىز ءالى كۇنگە دەيىن ولاردىڭ ءتىرى نە ءولى ەكەنىن بىلمەيمىز. وسىنى ويلاپ ابدەن كۇيزەلىپ بىتتىك. ءتىپتى كەيبىرەۋلەر پسيحولوگيالىق دەرتكە شالدىقتى. وسىندا كەلىپ، جاقىندارىمىز قايدا جۇرسە دە ءبارى جاقسى بولسىن ەكەن دەپ دۇعا تىلەپ جاتىرمىز.

 كەيبىر تۋىستار ءوز باۋىرلارىنىڭ قازا تاپقانىنا كوندىگىپ، مالايزيا اۋە كومپانياسىنان وتەماقى تالاپ ەتۋدە. ولار 120 مىڭنان 180 مىڭ دوللارعا دەيىن سۇراپ وتىر. مالايزيا اۋە كومپانياسىنا تيەسىلى Boеing-777 ۇشاعى وسىدان تۋرا ەكى جىل بۇرىن رادار بەتىنەن جوعالىپ كەتكەن ەدى. اۋە كەمەسى سوڭعى رەت بايلانىسقا كوككە كوتەرىلگەننەن كەيىن 40 مينۋت وتكەن سوڭ وڭتۇستىك قىتاي اۋە كەڭىستىگىندە شىققان. وعان قوسا ۇشاق جوعالاردان 10 كۇن بۇرىن تولىقتاي تەحنيكالىق تەكسەرۋدەن ءوتىپتى. ول كۋالا- لۋمپۋردان بەيجىڭگە بارا جاتقان بولاتىن.

www.24.kz