استاناداعى «شابىت» فەستيۆالىندە 238 ءبيشى سايىسقا تۇسۋدە
قازاقستاننىڭ وڭىرلەرىنەن، سونداي-اق وزبەكستان مەن قىرعىزستاننان 26 ۇجىم مەن سوليستەر، ياعني 238 ءبيشى ەلوردادا حالىق بيلەرىن ورىنداۋدا، دەپ حابارلايدى قازاقپارات.
مادەنيەت جانە سپورت باسقارماسىنىڭ مالىمەتىنشە، اتالمىش نوميناتسيا بويىنشا قازىلار القاسىنا ق ر ەڭبەك سىڭىرگەن قايراتكەرى، «ناز» مەملەكەتتىك ءبي تەاترىنىڭ كوركەمدىك جەتەكشىسى جانە باس بالەتمەيستەرى قاديشا اعىمبايەۆا جەتەكشىلىك ەتەدى.
بۇدان باسقا، قازىلار القاسىنىڭ قۇرامىندا شەشەنستاننىڭ حالىق ءارتيسى، «ۆايناح» انسامبلىنىڭ كوركەمدىك جەتەكشىسى ادنان ماجيدوۆ، رەسەي فەدەراتسياسىنىڭ ەڭبەك سىڭىرگەن ءارتيسى نۇرلان كامەتوۆ، «شالقىما» حالىق ءبيى انسامبلىنىڭ كوركەمدىك جەتەكشىسى، مادەنيەت قايراتكەرى ابدۋراسۋل ەسەكەيەۆ، سونداي-اق قازاق ۇلتتىق ونەر ۋنيۆەرسيتەتىنىڭ پروفەسسورى ايگۇل كۇلبەكوۆا بار.
«قازىلار القاسىنىڭ مۇشەلەرىنىڭ بارلىعى دا بۇرىن ءبيشى بولعان. ءارقايسىسىنىڭ حورەوگرافيادا مول تاجىريبەسى بار. ءبىز ەكىنشى تۋرعا 12 ۇجىم مەن سوليستەردى تاڭدادىق. قاتىسۋشىلاردىڭ دايىندىق دەڭگەيلەرى ءارتۇرلى. وتە مىقتى بيشىلەر دە بار. ءبىز دە، قاراپايىم كورەرمەن دە ءبيدى جاي تاماشالاپ قانا قويماي، ونى باعالاۋ ءۇشىن ادەمى بولعانىن قالايمىز. نومەرلەردىڭ كوستيۋمدەرى دە، مۋزىكاسى دا، حورەوگرافياسى دا، بي بارلىق جاعىنان ۇيلەسىپ تۇرسا، ول نازاردان تىس قالمايدى»، - دەيدى قاديشا اعىمبايەۆا.
حورەوگراف سىرعا لاتىپوۆا «شابىت» فەستيۆالىنە «شاتتىق» حالىق ءبيى انسامبلىمەن بىرگە قىرعىزستاننان كەلگەن ەكەن. قىرعىزستاننىڭ ەڭبەك سىڭىرگەن مادەنيەت قايراتكەرىنىڭ شاكىرتتەرى فەستيۆالدە بۇرىن دا باعىن سىناعان. ءار جىلدارى ونىڭ تاربيەلەنۋشىلەرى «شابىت» لاۋرەاتتارى اتانسا، بۇگىندە حورەوگرافيا ونەرىنىڭ شەبەرلەرى جانە ەڭبەك سىڭىرگەن پەداگوگتار اتاندى.
«ءبىر جىلدارى «شابىتتا» باعىن سىناپ، جۇلدەلى ورىندار العان شاكىرتتەرىم، بۇگىندە مادەنيەت جانە ءبىلىم وزاتتارى. «شابىت» ولاردى ونەر جولىنا جەتەلەدى، ولاردىڭ كاسىپقوي رەتىندە قالىپتاسۋىنا سەرپىن بەردى. رەسپۋبليكادا جاستارعا ارنالعان وسىنداي بايقاۋلار مەن فەستيۆالدەردىڭ وتكىزىلەتىنى جاقسى.
سەبەبى، بۇل جاستار شىعارماشىلىقتاعى مايتالمانداردى الماستىرادى، ءبىز ولاردى دايىندايمىز، جاڭا ەسىمدەردى اشامىز، ۇرپاقتار ساباقتاستىعى بار. بيىل 16-17 جاستاعى 17 ءبيشى اكەلدىك. ءاربىر كومپوزيتسيانى ورىنداعان كەزدە مەنىڭ شاكىرتتەرىم وزدەرىنىڭ دەربەستىگىن، ەرەكشەلىگىن كورسەتۋگە تىرىستى. ءبىز ويىمىزدى ىسكە اسىردىق دەپ ويلايمىن، - دەدى قىرعىزستاندىق ءانسامبلدىڭ جەتەكشىسى.
ەسكە سالا كەتسەك، وسىمەن 21- رەت وتكىزىلىپ وتىرعان شىعارماشىل جاستاردىڭ فەستيۆالىنە بيىل 10 مەملەكەتتەن 345 ۇمىتكەر قاتىسۋدا. 5-9 -قاراشا ارالىعىندا وتەتىن ونەر باسەكەسىندە دارىندى جاستار «كلاسسيكالىق مۋزىكا»، «حالىق مۋزىكاسى»، «ەسترادالىق ۆوكال»، «حورەوگرافيا» جانە «جۋرناليستيكا» نوميناتسيالارى بويىنشا باق سىنايدى.